ORANJESTAD – Diasabra ultimo pueblo henter por a gosa hunto cu nos baluarte di deporte Xander Bogaerts. Un hoben cu a y ta sigui destaca den mundo di baseball, ganando recientemente su di dos World Series Champion hunto cu e ekipo di Boston Red Sox.
Durante evento a honra Xander cu e reconocemento di Embahador di Bon Boluntad. Un reconocemento bon mereci, tumando na cuenta su merito y logro pa su mes y pa nos isla. Minister Dangui Oduber ta mira Xander como un hoben ehemplar pa hobennan den nos comunidad y ta contento cu e apoyo diasabra ultimo di parti comunidad.
Minister Dangui Oduber kier a tuma un momento pa gradici tur e patrocinadonan cu a haci e evento posibel. “Un danki ta bay na nos compania nacional di Telecomunicacion Setar, na TeleAruba, Aeropuerto Internacional Reina Beatrix, A.T.A., Massive Brassband y tambe na sr. Claudius Philips. Sin nan, e evento aki no tabata por ta posibel. Un danki ta bay tambe na e banda Le Groove pa e dushi ambiente”, Minister Dangui Oduber a expresa cu gratitud.
E mandatario ta di opinion cu di e forma aki cada patrocinado ta aporta bek na logronan di nos yiunan di tera, cual na su turno ta stimula mas hoben y tambe adulto pa sigui e rumbo aki.