ORANJESTAD, Aruba –07 november 2018: Durante dos dia largo Departamento di Salud Publico hunto cu Dr. K. Mung y Dr. T. Malcolm, conseheronan di Pan American Health Organisation (PAHO), a reuni cu diferente instancia, organisacion y fundacion na Aruba.
Meta di e bishita tawata pa delibera riba e problematica di malesanan no transmisibel of tambe yama malesanan cronico na Aruba y riba e importancia di bin cu un plan di accion multisectoral nacional segun guianan internacional.
Bou malesanan cronico ta wordo referi na malesanan manera cancer, malesanan di curason, malesanan di e sistema respiratorio y diabetes. Malesanan cronico ta afectando salud di nos comunidad grandemente, causando morto prematuro di nos hendenan, ta afectando nos calidad di bida y ta un carga financiero hopi grandi. Den region di Americas 8 den cada 10 persona ta fayece di e malesanan aki y en total ta causa 5.2 miyon morto annual.
Pa por yega na un plan nacional di accion pa e malesanan aki ta nesesario pa cuminsa primeramente cu un analisis di e situacion actual na Aruba conhuntamente cu tur stakeholder importante. Despues lo organisa un consultacion nacional unda lo traha hunto cu tur stakeholder of partner pa traha riba formulacion y implementacion di e plan. E plan nacional lo enfoca riba reduccion di e factornan di riesgo cu ta conduci na malesanan cronico manera mal alimentacion, inactividad, uzo di tabaco y abuso di alcohol.
Despues di e dos dianan di encuentro, Departamento di Salud Publico ta convenci cu un plan nacional ta sumamente nesesario y ta contento di por conta cu sosten di tur partner envolvi y ayudo di PAHO pa haci esaki realidad. Asina tambe pais Aruba por cumpli cu requisitonan internacional pa locual ta yega na e Metanan di Desaroyo Sostenibel esta ‘Sustainable Development Goals’ di Nacionnan Uni pa aña 2030.