ORANJESTAD – Aruba na e momento aki no tin un registro oficial unda cu por registra nos mediconan cu ta studia den region. Tur studiante, ya sea nan a studia por ehempel na Colombia, Costa Rica y te hasta Merca, mester bay registra den e sistema di BIG di Hulanda.
Desde inicio di gobernacion, Minister Dangui Oduber, encarga cu e cartera di salud a duna di conoce cu e kier trece cambio den e situacion aki, dunando asina e oportunidad husto cu yiunan di tera merece despues di a termina nan estudio pa ta medico. Cu esaki a inicia e proceso pa bin cu AruBIG.
Minister Oduber a institui un comision pa sondea tur e posibilidadnan cu tin. E comision aki ya tabata ocupa pa algo mas cu 7 luna pa asina yega na e miho solucion pa por reconoce tur persona cu ta biba na Aruba, a nace na Aruba y a/ta studia den region. Tin un consenso den e comision y a trece un proposicion riba mesa. E Minister a menciona cu e ta lamenta si cu e ex director di AZV, sr. Anko Ringeling despues di tabata sinta na mesa durante henter e proceso, na momento cu ya el a stop cu su funcion a duna un declaracion, treciendo bruhacion of insinuacion cu e comision ainda lo ta den discusion y cu na niun momento a yega na un consenso. “En todo caso mi ta contento cu e director nobo ta di acuerdo y ta sostene e proposicion cu tin riba mesa, solamente cu como AZV nan tin algun pregunta y como gobierno, nos ta habri pa contesta tur e preguntanan ey”, Minister Dangui Oduber a declara durante conferencia di prensa.
E minister ta compronde cu lo por tin resistencia of preocupacion di parti di algun medico specialista, kendenan ta teme cu e calidad di cuido por ser afecta. Minister Dangui Oduber: “Na momento cu a institui e comision, nos a bisa hopi cla cu e punto di salida ta cu importante den henter e proceso aki ta pa por mantene un calidad di cuido hopi halto.”
Parti di e proceso di AruBIG ta cu lo institui un institucion di calidad di cuido (kwaliteitsinstituut), cual su funcion ta pa determina kico ta e calidad di cuido cu nos como pais ta haya aceptabel. Minister Dangui Oduber ta pone enfasis riba cu na niun momento e intencion ta pa crea e discusion riba e calidad di cuido cu nos pashentnan mester haya, door di duna e oportunidad na nos mesun yiunan di tera cu a studia den region pa bin traha na Aruba.