ORANJESTAD, Aruba – Relaciona cu celebracion di Halloween, Riu Palace Aruba a organisa diferente actividad, tanto muchanan como adultonan a disfruta cu e team dinamico di RiuLand. Halloween ta un celebracion grandi na Merca y como tal huespednan ta sigui cu e tradicion, aunke nan ta cu vakantie.
E atardi a cuminsa cu show di thriller banda di pool. E siguiente actividad tabata trahamento di disfraz, unda cu e mayornan a traha disfraz cu material recicla pa nan yiu. Despues di a traha e disfraznan, huespednan a traha figura den e pampunanan. Den oranan di anochi huespednan a disfruta di e buffet cu chefnan di Riu Palace Aruba a prepara, cu un variacion grandi di cuminda. A decora e restaurant den tema di Halloween, haciendo uzo di e pampunanan cu huespednan mes a traha. A ricibi e huespednan cu un welcome drink na entrada.
Separa di tur esaki, e team di Riuland a organisa un evento di Trick or treat pe muchanan, cu a disfrasa na diferente personahe y a pasa un momento agradabel. A pasa na diferente restaurant di Riu Palace Aruba y a ricibi hopi mangel. E muchanan hunto cu nan mayornan a baila cu animadonan di RiuLand. Banda di e bar/theater area tabatin un duo di Riu cantando y entreteniendo huespednan. Na final di anochi huespednan a participa den un show di baile. Adultonan y muchanan a pasa un dia agradabel di celebracion di Halloween.
RIU Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 50 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.