Parlamentario Alan Howell, diahuebs mainta den Parlamento durante reunion publico a indica cu e dia aki ta uno historico pa nos dushi isla Aruba. Motibo pa bisa esaki ta cu despues di mas cu 4 decada, Parlamento lo pasa e ley di Ortografia di Papiamento.
El a indica cu e ley aki por sona algo hopi simpel, pero e ta encera hopi pa nos isla y nos idioma, pasobra nos lenguahe of lenga y nos ortografia ta un di e fundeshinan di nos identidad.
Parlamentario di POR durante su disertacion a bisa cu ta hopi hende a traha hopi duro y largo pa yega na loke Parlamento a trata diahuebs y finalmente e trabou duro ey ta wordo recompensa y nos idioma ta yega un stap mas leu pa haya e berdadero status cu e merece.
“Ya caba for di 1976 nos tin un ley di ortografia di Papiamento, pero durante transcurso di añanan e ortografia a wordo adapta, algo cu no ta nada straño y ta pasa den tur idioma tambe, renovando su mes, pero manteniendo e base etimiologico, contrario na e Papiamento di por ehempel Corsow cu tin su base fonologico.
Mirando e tendencia aki, na aña 2004 a bin cu un tipo di ortografia di transicion, permitiendo e uzo diferente di e mesun palabranan. Un ehempel bibo di esaki ta e palabra trabou, e por wordo skirbi cu ou of ao.
Despues na 2007 Parlamento a bay di acuerdo pa reduci mas tanto posibel e dos opcionnan aki y awe despues di 11 aña finalmente nos lo trata e ley aki despues di e presentacion di Departamento di Enseñansa na Parlamento”, Alan Howell a duna di conoce.
Na e parti final di su disertacion el a expresa cu como persona cu ta para pa nos idioma, cu ta parti di nos identidad, e ta sumamente contento di por forma parti di e constelacion parlamentario cu lo bay duna mas forsa ainda na nos dushi Papiamento pa sigui crece como idioma y yega na e nivel unda e mester tabata no awo, pero for di hopi aña atras caba!
“”Lenguahe ta e mapa di un cultura. E ta contabo di unda e hendenan ta bin y unda nan ta bay” Rita Mae Brown.