Hopi reto pa evita aumento insostenibel di debe
Philipsburg – Sint Maarten a presenta recientemente su Plan di Recuperacion Financiero. Segun e plan ey lo logra surplus presupuestario door di aumento di e entradanan for di 2021. Colegio di supervision financiero di Corsou y Sint Maarten (Cft) a pidi Sint Maarten pa tuma medida concreto di tal forma cu berdaderamente lo realisa e surplusnan planea. Teniendo cuenta cu e estado deficiente di e maneho financiero, Cft a yega na un palabracion cu Sint Maarten cu lo traha pa logra un declaracion aprobatorio di accountant hunto cu e cuenta anual di 2021.
Dia 10 di october u.p. Sint Maarten a presenta su Plan di Recuperacion Financiero. Door di recuperacion di economia, reduccion di gasto y reestructuracion di Servicio di Impuesto, Sint Maarten ta spera di realisa surplus presupuestario structural for di 2021. Presidente di Cft Raymond Gradus: “Medida pa economisacion di gasto y mehoramento di cumplimento cu regla na Servicio di Impuesto ta di crucial importancia pa logra ekilibrio den presupuesto. Ademas, un bon maneho financiero ta forma e base pa dunamento di cifra na tempo y confiabel. E plan di recuperacion aki tin bon elemento den dje y nos a pidi Conseho di Ministro y Parlamento pa implementa medida concreto pa e asuntonan ey.” Un ehempel di esey ta aprobacion di e legislacion di pensioen, cu mientrastanto a keda entrega na Parlamento pa trat’e.
Pa e proximo añanan Sint Maarten ta spera deficit den presupuesto. A ahusta e deficit spera pa 2018 na ANG 144 miyon. E proyecto di presupuesto pa 2019 ta cera cu un deficit di ANG 88 miyon. Como consecuencia di esey, ainda Sint Maarten lo sigui depende di prestamo pa sosten di likides, loke lo conduci na un aumento di e cuota di debe. Por lo tanto, Cft a conseha pa ta cauteloso cu hacimento di otro prestamo. Presidente di Cft Raymond Gradus: “Pa financiacion di e proyectonan di reconstruccion Sint Maarten lo mester orienta su mes riba e fondo fiduciario destina pa tal fin.”
Cumplimento di e puntonan den e instruccion di Conseho di Ministro di Reino na 2015 tambe a ocupa un luga prominente riba agenda. Consecuentemente, Sint Maarten mester compensa e deficitnan di e periodo 2010 te y cu 2014, mester resolve e atrasonan den pago y mester tuma medida pa mantene e sistema di pensioen di behes y e sistema di cuido medico structuralmente pagabel. E fechanan limite di e puntonan aki a caduca caba of lo caduca fin di e aña aki. Den varios combersacion a informa Cft tocante e avancenan. Parcialmente debi na e consecuencianan di horcan Irma Sint Maarten no ta capaz di cumpli cu tur e puntonan den e instruccion pa fin di e aña aki. Sint Maarten lo raporta tocante e avancenan y lo pidi Conseho di Ministro di Reino pa fiha fecha limite nobo pa e puntonan den e instruccion cu lo no ta soluciona pa fin di e aña aki. Den tal caso Cft a pidi atencion pa e medidanan pa reduci e deficitnan den e sistema di cuido medico.
Atrobe a pidi atencion pa e mal estado di e maneho financiero. Sin un maneho financiero solido un proceso presupuestario ordena no ta posibel. E criterio (definitivo) ta aprobacion na tempo di e cuenta anual cu un declaracion aprobatorio di accountant. A palabra cu Gobierno di Sint Maarten ta garantisa cu esey lo ta e caso cu e cuenta anual di 2021 y Cft ta tuma nota di e promesa aki cu satisfaccion. Tambe a priminti cu lo entrega e cuentanan anual di 2016 y 2017 e aña aki ainda. Aprobacion di e cuentanan anual di 2013, 2014 y 2015 ta previsto pa e proximo simannan.
Durante su bishita na Sint Maarten Cft a papia cu Gobernador, Conseho di Ministro, Ministro di Finansa, Ministro di Salud Publico, Asunto Social y Trabou, e Comision Financiero di Parlamento, representante di Banco Mundial, Aeropuerto Internacional Prinses Juliana y Fondo General di Pensioen di Sint Maarten. Esaki tabata e prome bishita di e miembronan nobo di Cft Henk Kamp, na nomber di Hulanda, y Russell Voges, na nomber di Sint Maarten. Ademas di nan, Presidente Raymond Gradus y Gregory Damoen, na nomber di Corsou, ta forma parti di Colegio.