Parlamentario Michael Lampe di fraccion di AVP, ayera mainta a haci entrega di un serie di pregunta na Parlamento, dirigi na Minister di Infrastructura y Medio Ambiente, Otmar Oduber relaciona cu e Proyecto di parke marino.
“Mi a entrega un serie di pregunta na Parlamento cu mester wordo dirigi na Minister di Infrastructura y Medio Ambiente, Otmar Oduber cu ta preguntanan cu ta biba den pueblo pa loke ta trata e proyecto di parke marino.
Hopi hende kier mas claridad relaciona cu e proyecto aki kendenan kier mas claridad riba e forma cu a atende cu e proyecto aki, entre otro ta con gobierno a selecta e area cu ta bay bira e marine park, si lo bay cobra pa entrada, si nos hendenan local lo tin cu bay paga pa nan por haci uzo di diferente actividad cu lo bay tin den e area di marine park aki.
Kico ta e stimulacion cu kier wordo duna tras di e marine park aki, si lo bay bin un parti educional pa muchanan compronde kico esaki ta nifica y si ta bay stimula por ehempel cierto tipo di piscanan, si ta bay stimula e mangrovenan.
Tin areanan cu mi por a compronde for di expertonan cu no necesariamente lo ta apto pa esaki y nos kier sa con ta para cu e decisionnan cu ta wordo tuma pa cu e parke aki.
Pues ta diferente pregunta cu mi a haci y dirigi pa Minister di Infrastructura Otmar Oduber pa loke ta trata nos marine park ya cu siguramente ta un punto hopi importante di nos naturalesa, con tin cu bay om cu nos naturalesa riba nos isla y nos kier tende esaki for di cerca, haciendo preguntanan skerpi pa di e forma aki nos ta sigura cu cierto decisionnan ta na bienestar di nos pais no solamente na bienestar di decisionnan politico y sigur nos ta bay sigui e desaroyonan di e marine park aki hopi di cerca.
Tin hende preocupa pa cu e proyecto aki y un grupo di piscadonan preocupa a entrega un carta di protesta y obhecion na Gobernado ya cu tin cierto inkietud pa e reglanan cu lo bay wordo introduci relaciona cu e parke marino aki, cu lo por perhudica nos piscadonan.
Fraccion di AVP ta sigui traha hunto cu pueblo y ta vociferando e incomodidad cu ta wordo sinti pa cu e proyecto aki y ta bon pa minister Oduber bin dilanti y dirigi su mes na pueblo aclariando tur e dudanan cu tin relaciona cu e proyecto menciona,” Parlamentario Michael Lampe a declara.