ningun caminda ta para den e rapport di Banco Central
Parlamentario Endy Croes ta reacciona riba e topico di siman regardando “EMANIPULACION” di Mike Eman y AVP. Mike Eman den conferencia di prensa a divulga un report cu Banco Central di Aruba a publica esta e “Business Perception Survey” cual ta un survey cu Banco Central ta haci entre comerciantenan y ta publica esaki. Mike Eman usando e mesun strategia bieu di AVP esta “Emanipulacion” cual a conduci na e desaster financiero y e Mega Debe di Aruba awor a resucita y kier confundi pueblo basa riba un survey di Banco Central. No solamente confundi y manipula pueblo cu informacion pero den su desesperacion politico Mike awor a comete “valsheid in geschrifte” trahando propio documento falso usando logo di Banco Central y pone como titulo pa e documento cu e mes a traha “Dramatic Drop in business reporting to be profitable” haciendo comosifuera cu e titulo aki ta di Banco Central. NINGUN pero NINGUN caminda den e Business Perception Survey di Banco Central e titulo cu Mike a usa ta aparece. Pues Mike Eman a usa un documento falso cu e mes a traha agregando LOGO di Banco Central pa manipula pueblo. Corectamente Fraccion di MEP mediante sr.Tjon a manda puntra Banco Central mediante Minister di Finansa si e documento cu Mike Eman a usa cu logo di Banco Central ta forma parti realmente di e Business Perception Survey di Banco Central. Den un carta data 12 di October 2018 Banco Central a contesta textualmente “de betreffende grafieken niet afkomstig zijn van CBA noch onderdeel uitmaken van haar publicatie”. Pues Mike Eman gara manera un Djaca den Trampa ta gaña atrobe. Mike no tin credibilidad mas y e mester a bay over na traha documentonan falso pa engaña un pueblo. Parlamentario Endy Croes ta hopi preocupa cu e modus operandi di Mike Eman y AVP y ta cuestiona fuertemente e manera di maniobra di un ex Promer Minister di Pais Aruba. Den mesun contexto Parlamentario Endy Croes kier sa kico ta e accionnan cu Banco Central ta bay tuma alrespecto e ‘valsheid in geschrifte’ cu Mike Eman a comete. No por ta asina cu por permiti esaki sin mas. Sr. Tjon a manda un di dos carta cu preguntanan alrespecto e tema aki pa asina haya claridad di Banco Central. Imposibel pa kere cu nada lo wordo haci “djis pasobra ta Mike Eman”. Lo keda en espera di un reaccion oficial di Banco Central. Mike Eman conoci tambe bao di e nomber “Hananais” kende ta un Profeta Falso di Babilonia segun scritura, Croes ta termina bisando.