Diamars merdia den e restaurant Aloe di EPB Hato, e 16 alumnonan di klas 4 di nivel 3, a haci nan prome training di “serveren” cu algun invitado y parlamentario Sue-Ann Ras (MEP) tambe tabata entre e invitadonan. E alumnonan di ‘doorstroom’ tabata e kokinan y a presenta un ‘3 course meal’ di culinario internacional.
BON EXPERIENCIA
Mayoria di e invitadonan tabata esunnan cu ta envolvi di un manera of otro cu e alumnonan di nivel 3 aki. E 16 alumnonan di examen klas di nivel 3 (mercado laboral) tabata completamente encarga, pa ehecuta e servicionan den un restaurant, den cual nan a haci practica y a haya conocemento di dje. “Mi ta sinti mi honra di por tabata presente na nan prome practica. Aunke nan tabata poco nervioso, nan habilidadnan tabata bon. Esaki sigur ta un tremendo experiencia pa nan, ya cu normalmente nan ta haci “rollenspel”. Tambe ta un bon momento pa veld y esunnan concerni haya un miho bista di kico e alumnonan ta haci y asina compronde kico tur ta pasa na scol,” Ras a expresa.
PARTNER
Ta di aprecia y admira cu Renaissance tabatin 2 chef presente, pa analisa y evalua e proceso y producto final.
Segun Ras: “Renaissance ta tuma hopi alumno y ta un bon partner. Esaki sigur ta un paso y decision hopi positivo. Nan a indica di ta hopi Interesa pa traha mas estrecho cu e scol y e alumnonan.”
Ras ta haci un apelacion y kier encurasha nos companianan den sector di horeca, pa nan tambe bira partners y brinda nos hobennan mas oportunidad y trabou den e sector di horeca. “Mi por a combersa cu algun alumno y e cambio di mentalidad y disposicion pa traha den sector di horeca t’ey. Nan ta sinti nan capaz y pasiona pa eherce e funcionnan aki y sigur e actitud di amabilidad ta sobresali cerca nan,” Ras a finalisa bisando.