Riba peticion di Gobierno di Aruba, Gobierno Hulandes a manda un persona Aruba pa duna asistencia tecnico pa yuda setup Camara di Integridad. Señor Alain Hoekstra ta e ayudo tecnico cu Hulanda a manda. Señor Hoekstra ta traha na Hulanda na ‘Huis voor Klokkenluiders’. E siman aki, señor Hoekstra ta asisti señora Amalin Flanegin y demas departamento cu mas tanto conseho posibel pa asina institui e Camara di Integridad di Aruba mas pronto posibel.
Señor Hoekstra lo ta orador tambe na e Conferencia di Integridad cu ta tuma luga diaranson 16 di october pa hefenan di departamento y hefenan suplemente di departamento y pa funcionarionan di departamento cu ta traha rib’e tereno di personal.
“E tipo di asistencia cu señor Hoekstra lo brinda Aruba, ta di hopi importancia pa Gobierno di Aruba y ta refleha cu e relacion entre Gobierno di Aruba y Gobierno di Hulanda ta mehorando pasobra Hulanda tambe ta realisa e importancia di e trayectoria di integridad cu Gabinete Wever-Croes ta encaminando”, Prome Minister Evelyn Wever-Croes a enfatisa.