Dia 16 di oktober ta dia Mundial di Alimentacion (World Food Day). E fecha aki ta brinda e oportunidad pa pone enfasis riba e tema cu ta boga pa pone un fin na hamber mundialmente. UN kier pa logra yega ‘Cero hamber na 2030’. Un di e accionnan pa logra esaki ta pa educa e poblacion pa stop cu desperdicio di cuminda.
Na Aruba mescos cu otro paisnan desaroya tin hopi desperdicio di cuminda. Wak rond di nos: restaurantnan cu ta benta cantidad di cuminda afo; wak na bo mesun cas cuanto cuminda ta bay benta afo. Sin conta mes e cantidad cu ta benta afo solamente den preparacion di e cumindanan cu nos ta cumpra na restaurant y den cumindanan paketa caba cu nos ta cumpra den supermarket. Esaki ta inhusto si bo wak na otro paisnan hendenan ta sufri y muri di hamber.
Sin menciona cu dia pa dia cuminda ta bira mas costoso. Mas cu suficiente motibo pa siña maneha nos cuminda mihor y evita cu cuminda y placa ta bay perdi.
Akibou ta sigui 6 stap simpel cu por wordo haci den bida diario pa minimalisa e desperdicio di cuminda:
- Sea creativo den cushina: cushina na cas ta un di e mihor formanan pa evita bentamento di cuminda afo. Por scohe ingredientenan na midi y di region. Cumindanan prepara na cas ta mas saludabel compara cu cuminda cumpra na restaurant/fast food. Na cas bo tin mihor control riba e cantidad cu bo ta pone den bo tayo.
- Re-usa resto di cuminda: si a resta cuminda por tape bon y warde riba un forma corecto caminda cu bo por keinta pa come despues. Of por usa e resto pa traha otro tipo di cuminda manera por ehempel aroz por use pa traha mixed fried rice of ‘aroz con leche’. Resto di pan por usa den balchi of pa traha un panboyo.
- Come saludabel: come saludabel no mester nifica cu e mester ta caro y complica. Un plato saludabel por ta algo simpel y facil. Algun ehempel: pecho di galiña prepara a la plancha cu salada di lechuga, tomati y comcomber cu poco lamunchi/azijn, poco aroz of batata herbi.
- Cumpra na midi: nos por tin e custumber di cumpra di mas. Esaki tin ora pa spaar nos un ‘trip’ pa supermarket. Pero hopi biaha e resultado por ta cu e productonan fresco ta daña. Haci compra sabi y na midi.
- Pone atencion riba e fecha di vencemento: no solamente na supermarket sino tambe e cuminda cu bo tin den bo frigidair of cashi. Esaki ta pa evita cu e fecha ta pasa y bo mester tira e cuminda afo.
- Purba planta fruta (lamunchi, patia), berdura (pampuna, bonchi) of specerij (yerb’i hole, cilantro) na cas. E lugar no mester ta grandi, hasta den un pochi por planta.
Ta hopi importante pa mayor/educador siña e muchanan con importante ta pa no desperdicia cuminda. Pa nan compronde cu tin hopi hende grandi y mucha cu no tin suficiente pa come. Siñanan con nan mes por prepara algo pa nan come y cu nan mes por planta pa nan come.
Pa mas informacion tocante di alimentacion y actividad fisico por tuma contacto libremente cu Instituto Biba Saludabel y Activo (IBiSA) na telefoon 5824987. Of via email [email protected]