Parlamentario Endy Croes a splica cu haciendo su trabao como Parlamentario usando su derecho pa haci preguntanan via canalnan oficial mediante Staatsregeling III.17 y Reglement van Orde – Artikel # 59, el a haci un serie di pregunta na WEB NV. Un di e preguntanan entre otro tabata alrespecto prijs di coriente desde 1999 pa 2018 reparti den un tabel pa cada aña incluyendo e prijs pa bari di fuel y uso di cantidad di bari di fuel pa cada aña. Basa riba e informacionnan ricibi oficial di WEB NV e Parlamentario a ricibi e informacionnan necesario pa por haci diferente calculacion pero tambe di un vez pa semper frena e mentiranan tendencioso di politiconan di AVP.
Nos por corda con tanto Mike Eman y Mike De Meza semper ta manipula den prensa cu AVP a baha prijs di coriente cu 16.6%. Esaki ta un di e rasonnan cu parlamentario Endy Croes a haci su investigacionnan y awe cu e tin tur cifra real den man por bari e ponencia y mentiranan di Mike Eman, Mike de Meza y AVP for di mesa. Mike Eman ta conoci na Aruba como sinonimo di e profeta falso Hananias. Un profeta di mentira. Wel pueblo awe nos por informa pueblo cu den 8 aña den comparacion cu e prijs na 2009 promedio Mike Eman y AVP a percura pa un aumento drastico di 35.7% di e prijs di coriente.
Mescos Mike De Meza tambe ta manipula pueblo cu informacionnan falso y awe nos a “catch” e mentirosonan aki con nan kier keda instiga, manipula y engaña pueblo. Prijs pa kWh na 2009 tabata 0.2713 cent y prijs pa kWh na 2017 tabata 0.3681. (Fuente: WEB NV). Mi ta pidi pueblo un fabor pa no laga Marlon Sneek calcula esaki pasobra nos ainda no a lubida con Marlon Sneek a calcula 6 luna na 39000 ta 2.4 MIYON. Pues ful fout y un error garafal.
Realidad di bida ta cu como politico mihor bo ta sincero y no tira para, gaña of manipula. E berdad semper lo sali na cla y cu cifranan oficial di WEB den nos man y awe cu pueblo a brinda nos e oportunidad pa sirbi pueblo nos por yega na informacionnan cu antes nos no tabatin. Nos deber ta haci pregunta, investiga y manera nos logra ricibi e informacionnan concreto y documenta nos lo percura pa comparti esakinan cu pueblo den tur transparencia y asina poco poco decifra esnan cu a causa e desaster financiero cu e baranca aki. Asina poco poco nos lo educa pueblo cu nos hayazgonan cual ta e puro berdad.
Pueblo mester por compronde ta ki tipo di hende tabata dirigi Aruba. No mas corupcion, no mas mentira, no mas profetanan falso. E puro berdad ta cu Mike Eman y AVP a aumenta prijs di coriente cu 35.7% den 8 aña den comparacion cu 2009. AVP nunca pero nunca mas mester bolbe na poder Croes ta termina splicando.