Na aña 2020, Aruba lo wordo evalua pa CFATF pa mira si tur regulacion ta na luga pa Aruba por combati labamento di placa y financiamento di terorismo efectivamente. 4 aña pasa Aruba a wordo evalua di cual evaluacion a resulta cu e gobierno anterior no a duna e atencion necesario na esaki. Consecuentemente, e trabounan pa cumpli cu e evaluacion di 2020, a cuminsa te ora cu gobierno a cambia.
Minister President Evelyn Wever-Croes ta dirigi e comision cu ta prepara e trabounan aki y ta wordo asisti pa DWJZ. Tur instituo cu ta relaciona cu e tema di labamento di placa ta representa den e comision. Minister President a yama e comision aki hunto pa na un forma dedica y comprometi cuminsa traha pa asina Aruba sali bon di e evaluacion di 2020.
Den e cuadro aki, Minister President a viaha pa Washington pa haci un peticion na World Bank pa yuda nos prepara pa e evaluacion aki y a rais di e peticion aki, siman pasa un delegacion di World Bank tawata na Aruba pa asisti Aruba den indentifica cua ta e riesgonan cu mester haya atencion.
A organisa un workshop siman pasa na unda Prome Minister a haci e acto di apertura. Durante e dianan di e workshop, e trabounan a wordo haci pa tur e diferente instancianan cu ta trata cu labamento di placa y financiamento di terorismo pa inventarisa cua ta e accionnan cu ainda mester wordo tuma pa asina nos sigura cu Aruba ta sali bon di e evaluacion aki. Esaki ta e unico manera pa evita cu Aruba ta bay riba un blacklist.
Gobierno di Aruba y Prome Minister Evelyn Wever-Croes en particular ta sumamente compremeti pa Aruba cumpli cu tur rekisitonan pa asina Aruba sali bon di e evaluacion di 2020 y implementa tur proceso y regla necesario pa evita labamento di placa y financiamento di terorismo for di Aruba.
