ORANJESTAD – Spotlight di mundo di timeshare tabata riba nos isla recien, por medio di e International Shared Ownership Investment Conference. E prestigioso gigante global Interval International tabata organisador y anfitrion di e evento, den su di 20 edicion. Propietario, desaroyador y ehecutivonan halto di companianan mas renombra rond mundo a asisti durante dos dia na sesionnan interesante.
Oficina di Turismo Aruba ta sumamente complace cu Interval International a scoge Aruba como sede pa e encuentro importante aki ya cu ademas di resalta nos isla como un modelo den e industria, a sa di reconoce e trayectoria di pioneronan Arubiano Raymond Maduro y Jan van Nes, ademas di brinda companianan local e oportunidad di actualisa y avansa den diferente aspecto di e sector.
Den pasado e conferencia aki tabata conoci como ‘Timeshare & Resort Investment Conference’ y den transcurso di tempo a ahusta pa ‘Vacation Ownership Investment Conference’ pareu cu e evolucion di e propio industria. Awendia ta papia di ‘shared ownership’, ya cu e modelo anterior conoci como timeshare, caminda e bishitante/turista ta un cumpra un ‘fixed week’ na un resort, a cambia considerablemente.
E conferencia a habri cu palabranan di Marcos Agostini como Vice President Ehecutivo pa Bentanan Global y Desaroyo Comercial di Interval Internacional. Consecuentemente CEO di A.T.A. Sra. Ronella Tjin Asjoe-Croes a bin dilanti pa brinda e asistentenan un bonbini mencionando cu e aña aki Aruba a conmemora tambe un momento importante den e industria di timeshare, cual tabata su 40 aniversario di existencia. Na 1977 Raymond Maduro a habri e prome propiedad cual tabata Aruba Beach Club y cu esey nos isla a comberti den un di e prome destinacionnan na mundo pa ofrece e opcion di tin un propiedad timeshare. Awendia Aruba tin un total di 13 propiedad di e tipo y ta considera como e capital di e industria pa loke ta e region di Caribe.
E ehecutivo tambe a indica cu, durante e ultimo decada, Aruba a conoce un crecemento constante di 3% promedio pa loke ta bishita di turistanan pa timeshare y esey ta representa 26% di e cantidad total di bishitante cu ta yega Aruba pa aña. “Como Oficina di Turismo Aruba nos ta comprometi na dirigi e posicionamento di Aruba y lidera un desaroyo innovativo y sostenibel na beneficio di e comunidad Arubiano y e bishitante, den colaboracion estrecho cu socionan clave manera Aruba Timeshare Association (ATSA) y doñonan di propiedad vacacional riba nos isla,” Tjin Asjoe-Croes a indica. A bisa acerca cu “nos mester aprecia e lealtad cu nos bishitantenan ta demostra na nos. Nan ta, despues di tur cos, e vehiculo number uno den mercadeo. 38% di esnan cu ta bishita ta indica cu nan a scoge Aruba danki na e recomendacion di un famia of amigo. Nos amigonan den timeshare ta probablemente nos vocero di mas ferviente y esaki ta bal oro.”
Ademas di un presentacion special di ATSA inclui den e programa, e conferencia a haci un analisis di e desaroyonan mas recien den e industria, tambe a elabora riba e tema di mercadeo den era digital; cual ta mesun tema cu United Nations World Tourism Organization y A.T.A. a enfoca riba e celebracion di Dia Mundial di Turismo. Ta bon pa menciona cu varios experto local a sirbi como panelista den e conferencia cu a clausura dirigiendo nan mes na participantenan for di riba 20 diferente nacion.
