Recientemente a tuma luga e inauguracion di MO-B LAB na MFA Santa Cruz. Pa e ocasion aki Minister di Enseñansa, Ciencia y Desaroyo Sostenibel Drs. Armando Lampe a duna un discurso cortico rib’e iniciativa riba tereno di innovacion di Prome Minister Evelyn Wever-Croes.
“Dianan despues cu Gabinete Wever-Croes a keda instala, Prome Minister a yama un reunion pa dialoga rib’e tema di e era nobo digital moderno. Esaki ta e vision for di prome dia di Gabinete Wever-Croes. “MO-B LAB” ta un proyecto cu ta plasma den e plan di gobernacion y awe e ta un realidad”, Minister Lampe a duna di conoce.
E titular di Enseñansa, Ciencia y Desaroyo Sostenibel a duna elogio na Prome Minister Evelyn Wever-Croes pa su entusiasmo y eficiencia pa cu e proyecto innovativo aki. No ta un secreto, segun e mandatario, cu ideanan cu ta regarda gobernacion por tuma su tempo, sinembargo e proyecto aki a wordo canalisa den corto tempo.
Minister Lampe a gradici Directora di Biblioteca Nacional señora Astrid Britten cu na prome momento a duna su cooperacion pa realisacion di e proyecto aki cu lo benificia nos futuro generacionnan.
“Bibliobus cu ta representa e sistema tradicional di bukinan geprint a wordo converti den un “mobile lab”, MO-B LAB, unda cu e ta expresa e era digital den su totalidad y ta un cambio simbolico den e mundo moderno cu nos ta biba den dje”, Minister Lambe a bisa.
Minister Lampe ta alerta nos futuro generacionan cu tin profesionnan cu lo bay surgi y otronan cu lo bay disperse. P’esey ta importante pa instrui nos muchanan pa ta creativo y ta bon prepara pa cambionan di futuro.
E mandatario a finalisa felicitando nos muchanan cu e MO-B LAB y ta encurasha nan pa nan haci bon uzo di dje.
