TA MAS IMPORTANTE PA PONE E SER HUMANO CENTRAL CU PA PERCURA CU NO TIN DEFICIT MAS
E reunionnan di nivel halto di siman pasa na New York, a duna Prome Minister Evelyn Wever-Croes oportunidad pa intercambia ideanan di maneho y duna informacionnan concreto di tur loke Gabinete Wever-Croes ta haciendo pa goberna un pais cu a hereda retonan grandi especialmente riba e tereno financiero y social.
Prome Minister a hiba palabra tambe durante e reunion cu ECLAC, EU y OECD. ECLAC ta un organisacion cu ta yuda paisnan den Caribe y Latino America. EU y OECD ta insistutonan cu ta percura pa e sistema di impuesto di cada pais no tin mucho concurencia falso.
Aruba ta hayando hopi presion di OECD den e ultimo temponan. Prome Minister a splica den e reunion aki cu Aruba ta un isla chikito cu hopi retonan den cua Gobierno di Aruba ta purba cumpli mas tanto posibel. Segun e mandatario principal di nos pais, OECD por yuda si nan baha e presion un tiki y tene cuenta cu como un isla chikito nos ta un tiki mas vulnerabel cu paisnan grandi por lo tanto tambe, tin mester di mas tempo pa antende cu nos asuntonan. Esaki ta haci tambe cu nos mester mas espacio di organisacionnan internacional manera esnan menciona pa nos vense tur nos retonan y tambe nos mester di nan sosten pa ehecuta nos plannan. Actualmente nan ta midi Aruba igual cu paisnan grandi entre otro Francia y Alemania. Prome Minister a informanan enfaticamente cu no por compara nos economia cu e paisnan grandi aki.
“E reunionnan a bay hopi bon y cu hopi comprension pa pais Aruba. E institutonan aki a comprende cu di berdad Gabinete Wever-Croes ta atende cu e retonan social y financiero cu tur prioridad. Mi a enfatisa na nan cu e retonan financiero ta importante, pero pa Gabinete Wever-Croes ta mas importante pa pone e ser humano central”, Prome Minister Evelyn Wever-Croes a duna di conoce.