Durante e conferencia di prensa di dialuna mainta, e titular di e cartera di Transporte, sr. Chris Romero, a anuncia cu a logra yega na un acuerdo pa finalisa e relacion laboral entre Arubus NV y sr. Teo Croes.
Despues di a hiba diferente combersacion pa cu e maneho y futuro di Arubus, Minister Chris Romero y sr. Teo Croes a yega na un acuerdo amistoso pa termina e relacion laboral entre ambos partido. “Siman pasa diabierna nos a yega na un acuerdo caminda nos a dicidi cu cada ken ta sigui diferente direccion. Sr. Teo Croes tambe kier continua cu diferente reto pa cu su bida priva y profesional”, e mandatario a duna di conoce durante conferencia di prensa.
Gobierno kier mira otro resultadonan den e companianan estatal di transporte y pa por yega na e cambionan desea mester tuma accionnan diferente. Pa es motibo aki a yega na un comprendemento mutuo cu sr. Croes. “E ta asina berdad cu ora bo kier un cambio, bo tin pa haci cosnan diferente. Nos ta kere cu esaki sigur ta un di e camindanan cu nos mester a tuma y nos ta desea sr. Croes hopi exito den su bida profesional pa cu futuro”, tabata palabra di Minister Romero.
Pa por sigura cu e operacion diario di Arubus lo continua cu normalidad, Minister Romero a articula un ekipo di maneho provisional cu ta consisti di miembronan di e Hunta Directiva mes di Arubus. Mientrastanto lo habri un solicitud pa e posicion como Director di Arubus. “Esaki ta un parti transitorio. Den statuto ta duna “aandeelhouder”, esta Gobierno, e posibilidad pa haci esaki”, Minister Chris Romero a enfatisa.