E tabata haci cosnan straño contra ley y hasta huez a bati riba su dede y bisa cu e ta kibrando nos estado di derecho
Den e caso di ex minister Benny Sevinger e cosnan a bay asina leu bou gobernacion di AVP cu actonan di corupcion y iregularidad cu awor e ta un ex minister bou investigacion.
Marisol Lopez-Tromp ta splica cu tin un mocion di Parlamento firma door di mayoria cu ta instrui gobierno, specificamente minister di Infrastructura actual pa haci un investigacion forensico den DIP riba tur e iregularidadnan di tereno cu a tuma lugar bou di gobernacion di AVP, tambe pa investiga con e casnan durante tempo di ex minister Benny Sevinger a wordo otorga na Seroe Colorado y tambe investiga e placa cu e tabata pidi na inversionistanan pa deposite riba cuentanan y con esaki a core.
Parlamentaria di POR ta indica cu esaki ta e tipo di cosnan cu Sr.Benny Sevinger ta core pe, e no kier papia di esaki , cu ora e bay prensa e ta papia di Lopez-Tromp, lo cual no ta un problema, pero pa e bin cu cosnan veridico si, no manera ta e caso awor unda ta declara cosnan cu no ta posibel. E ta pone enfasis riba e parti aki pasobra si tur loke el a haya ora el a bira minister si e no tabata kiernan of su gobierno no tabata kiernan, e mester a menguanan y bahanan.
Contrario na esaki ex mandatario Benny Sevinger a bay mesa bek cu varios di e inversionistanan aki, ora nan opcion a caduca, nan periodo a vence, a termina y no por a sigui mas y toch a dunanan extra tereno, laganan construi mas halto y dunanan mas camber. Di e forma aki el a bay liña recta contra e mocion aproba pa su fraccion di AVP den Parlamento cu a pidi pa bin cu un moratorio pa 10 aña riba cambernan di hotel, timeshare y condominio.
Ex minister Benny Sevinger a dicidi di pasa 1680 acta pa condomio extra pa no papia mes di tur e cambio di destinacion cu el a aproba.
Segun declaracionnan di Sr. Benny Sevinger, e no a haya espacio bashi pasobra e ex minister Lopez-Tromp a otorga e terenonan, cu e no tabatin espacio pa haci nada. Riba esaki Lopez-Tromp a bisa cu cualkier decision cu a wordo tuma e tempo ey pa proyectonan of pa cas mes, tur tabata cana nan caminda normal, legal, manera mester ta y via departamento. Na final ora tur departamento pone nan conseho, Lopez-Tromp como ex minister tabata firma. Pesey tin tur documento awor aki, pero den e caso di ex minister Benny Sevinger ta diferente y net pa robes, e ta cuminsa na firma un aprobacion cu ni departamento di DIP tabata sa di dje, coleganan no sa di dje, e ta firme pafo, bou palo, of unda cu ta den bestuurskantoor. Ora cu e gobierno actual a sinta sorpresa tras di sorpresa a bin pasobra ta pop-up hala di documento y actanan cu ni departamento tabata sa di dje.
E comportacion aki ta uno hopi grave cu tabata andando basta tempo caba unda cu e ex minister Benny Sevinger a haye ta haci cosnan hopi straño contra ley. Por ehempel, e tabata duna hendenan cu ta sospechoso pa haya tereno den un dia, por corda e caso di Roberto Rincon, sospecho e tempo ey di labamento di placa y soborno entre otro.
Tambe el a otorga hotel contra ley, cambia destinacion te cu huez a bati su dede bisando cu e ta kibra nos estado di derecho. E situacion a bay asina leu cu na aña 2016, tempo cu Marisol Lopez-Tromp ainda tabata forma parti di fraccion di AVP y tabata Presidente di Parlamento a vota na fabor di un mocion pa baha Benny Sevinger como minister. Esaki debi cu su actonan tabata asina grave, tabata haci actonan contra ley, no kier a mehora su mes, no kier a bin cu investigacionnan den su mesun departamentonan pa drecha loke a bay robes y no tabata ‘give a damn’ manera e mes ta bisa. E mocion aki no a conta cu sosten di mayoria, pero si a mustra e mal rumbo cu e tempo aya e minister aki tabata bayendo.
Awe por wak e consecuencia di esaki, pueblo ta wordo sorpersa cu 7 mil camber mas di e periodo cu Benny Sevinger ta responsabel y tabatin tur e poder pa firma of no firma. En bes cu el a para pa su actonan y bisa cu el a haci esaki pa tal y tal motibo, e ta purba sconde tras di lomba di Marisol Lopez-Tromp of di Minister Otmar Oduber, cual ta ridiculo pasobra tur e acuerdonan, opcionnan di e periodo di Lopez-Tromp a vence si hendenan no a cumpli cu nan.