“E publicacion reciente di Banco Central tocante e confiansa bou di empresanan den nos economia ta confirma un biaha mas e preocupacionan cu fraccion di AVP a vocifera durante e ultimo lunanan,” Parlamentario Richard Arends a bisa.
Segun e estudio di Banco Central, inversionan lo sigui baha y e cantidad di empresa cu a indica di lo tin ganashi e aña aki a baha cu 21%. “Asina Banco Central ta añadi su mes na e lista di instancianan local y internacional cu ta confirma cu perspectivanan economico negativo,” Sr. Arends a declara.
Por nota cu e empresanan cu a participa den e estudio a duna Gobierno beneficio di duda na momento cu nan a asumi responsabilidad, pero e falta di un maneho concreto pa finanzas publico y riba tereno economico a percura pa e confiansa aki desaparece.
“E incertidumbre riba e maneho financiero y economico a causa cu inversionan y consumo den sector priva ta wordo posponi.”
E desaroyo aki tin un efecto negativo riba e crecemento economico premira – maske hopi conservativo – y tambe e entradanan di Gobierno. “Asina nos ta drenta den un circulo vicioso manera cu nos a teme,” Sr. Arends a sigui bisa.
“Como gobernante bo tin e tarea pa mantene stabilidad y duna confiansa. Te awor nos a wak lo contrario,” Sr. Arends ta resumi. Tur hende por corda un minister di Finansas ta profetisa un posible downgrade den su prome conferencia di prensa, of e ponencia cu 93 cen di cada florin ta bay pa paga debe cu ta wordo usa keto bay ta un falta di conocemento di e materia.
Mescos ta conta pa decisionan adhoc cu consecuencianan enorme pa nos economia y mercado financiero, manera tabata riba e eliminacion di exoneracionan di BBO. Sin lubida e supuesto caos cu nan ta encontra tur caminda, cu ta bisa hopi mas di e gobierno su capacidad y habilidadnan pa por atende cu e retonan diario di gobernacion. Tambe e Parlamentario ta recorda cu CAFT ta wordo expande over di full e periodo di gobernacion di e gobierno actual y esaki ta confirma na mes momento un falta di confiansa den maneho financiero.
“Hecho ta cu loke a wordo presenta door di e gabinete actual na maneho a duna ni sector priva ni agencianan di evaluacion confiansa cu por logra un outlook stabiel of un desaroyo economico positivo riba termino mediano”, Parlamentario Sr. Richard Arends a declara.
“E ‘confiansa’ local y internacional den e gabinete actual cu tanto ta gaba cun’e no ta materialisa ainda.”
E miembro di Parlamento pa fraccion di AVP, a expresa un biaha mas su preocupacion pa e ausencia di un maneho financiero coherente, como tambe un falta di proactividad pa oportunidadnan economico.
“Nos no sa kico ta e plan di diferente ministerionan pa e proximo cuater aña. Nos no ni sa kico ta spera nos otro aña,” Sr. Arends a finalisa referiendo na deficit di e presupuesto 2019 cu ta 130 miyon di florin menos compara cu aña pasa sin cu nos sa detayes ni tampoco kico ta e consecuencianan di esaki pa e ciudadanonan y empresanan.