Psikiatra na Respaldo ta pidi asistencia di polis pa busca un hoben di 17 aña cu problema mental

Shaba: Diabierna pa mas o menos 12’or y 45 di merdia ta presenta na Warda di Shaba e homber di inicial v.G. kende ta un psikiatra na Respaldo (ex PAAZ).

E la bin pidi asistencia di Polis pa busca e hoben F di 17 aña, kende tin problema mental y probablemente lo no bay boluntariamente cu nan pa RESPALDO (ex PAAZ).

Hunto cu patruya di Noord y un patruya di K-9, nan a bay na e adres na Alto Vista, unda e hoben a wordo informa door di su tata cu e mester bay RESPALDO y cu e lo wordo interna eynan.

E noticia a cay hopi malo cerca F., ela bira mesora agresivo y a resisti fuertemente contra esaki.

El a cuminsa manda scop y tira mokete den tur direccion. Polisnan tabatin basta problema pa logra pone den boei pa despues hink’e den e transportwagen.

Ela te hasta purba bringa cu e psikiatra, a comete destruccion na e transportwagen, kibrando un lus di dilanti.

Manera cu nan a logra pone den transportwagen, a bay cune hopi lihe na  Respaldo pa asina evita cu e por sigui cometee mas destruccion.

Na yegada na e clinica tambe el a lanta cu e personal, pero Polis hunto cu e personal a logra pone riba cama, unda cu finalmente el a logra haya su calmante.

Un situacion hopi fastioso y tristo pa un famia, cu tin cu trata cu un miembro di famia, cu tin problemanan serio mentalmente, ban spera cu e hoben aki haya e atencion medico necesario, cu e calma y cu su famia lo por biba cu nan ser keri trankil den cas.