Minister di Finanzas, Asuntonan Economico y Cultra mr. Xiomara Ruiz-Maduro: “MIKE EMAN NO TIN AUTORIDAD MORAL PA PAPIA AWE RIBA ECONOMIA” 

ORANJESTAD – Pueblo a keda babuca di e declaracion di Mike Eman den prensa y por constata cu un biaha mas e lider di AVP ta demostra cu e no a siña y ta keda recuri na malinforma y trata di manipula nos Pueblo.

Varios bez nos a trece den publicidad cu ta netamente e estilo di hiba politica aki di AVP ta locual a hinca nos pais den e desastre financiero cu awe e Gobierno actual ta hereda. Mike Eman su gobierno a hiba un maneho descabeya di traha debe, manipula cu cifra, presenta presupuesto ficticio y irrealistico. Den apenas algun aña di AVP den gobernacion nos Pais a conoce deficit y debe nunca antes bisto pa cual Banco Central a adverti caba na aña 2011.

E mal maneho financiero a pone nos Pais perde credibilidad financiero, tranca economia desde 2015 y hasta hiba nos Pais bou di supervision financiero di Hulanda por medio di CAFT.

Pesey Sr Eman mester realisa cu e situacion penoso cu nos finanzas publico y nos economia ta aden ta hiba su nomber y fam. Pa e motibo aki awe Sr Eman no tin ningun autoridad moral pa bin cuestiona e Gobierno actual cu ningun rapport di Banco Central den man. Pasobra si e ex mandatario den e 8 aña cu a pasa a tuma tempo pa lesa kiko tur e rapportnan di Banco Central, IMF, Standard and Poor’s, Raad van Advies, Controlaria General etc etc a purba splike, awe nos Pais no tabata hinca den e situacion penoso aki.

Si di berdad sr Eman kier yuda pais Aruba, e y tur su colleganan di Partido AVP mester pidi Pueblo despensa y para responsabel pa nan actonan descabeya di manipulacion y falta di respet na nos propio yiunan, cu ta esnan cu a wordo malamente endeuda pa e mal maneho di Gabinete Eman. Pasobra pa sali di e abismo cu Eman a hinca nos aden y pa recobra credibilidad financiero y yega na un finanzas publico manehabel lo tuma tempo y no lo ta nada facil. Te na aña 2039 nos lo yega na e situacion di 50% di debe di GDP cu Eman a haya ora ela drenta den gobernacion na 2009. Esaki no ta manipulacion, sino e berdad sunu cu ta pone cu awe sr Eman no tin ningun autoridad moral pa cuestiona ningun otro hende pa e consecuencia di su mesun mal maneho.

Gabinete Wever-Croes a scohe pa presenta e realidad financiero y no bay sinta manipula cu cifra. Nos a asumi e responsabilidad pa traha pa por recobra e credibilidad financiero di nos Pais. E tarea no ta uno facil y pesey nos no ta bay permiti ningun ex mandatario of ex MinPres bin bruha tera djies pa purba bagatalisa of stroba nos trabounan na beneficio di nos Pueblo y Pais. Aruba mester di sinceridad y positivismo pa nos sali dilanti. No tin espacio mas pa manipulacion y negatividad di esnan cu a causa tanto danio na nos Pais.

FINAL.

Ministery of Finance, Economic Affairs and Culture
L.G. Smith Boulevard 76
Oranjestad, Aruba
T: (297) – 528-4900 Ext. 5025
T: (297) – 746-0428
F: (297) – 528-7538
E: [email protected]