Pa hopi aña nos cu tabata afor di politica tabata scucha di pueblo e necesidad di un cambio pa por garantisa bon gobernacion y transparencia. E ultimo 8 añanan di Gabinete Eman I y II a haci esaki mas necesario ainda den bista cu tur cos cu tabata imposibel a bira posibel creando caos pero tambe dunando mal ehempel y creando posibilidad pa manehonan coruptivo y cu a termina den detencion di un Minister den funcion manera tabata e caso di sr. Paul Croes y a marca e historia unda cu e mayoria den parlamento tambe tabata para pa mal maneho y corupcion door di acepta pa e Minister den prison keda den funcion. Banda di esaki actualmente tin investigacion andando contra entre otro diferente minister di Gabinete Mike Eman.
Awor cu nos ta den parlamento nos sigur kier trece cambio pa trece confianza bek den pueblo den funcionamento di gobernantenan pero tambe di departamentonan. Y pa logra esaki ta di vital importancia pa tin leynan di integridad pero tambe percura pa tin e Camber di Integridad pa por controla nos gobernantenan tambe.
Departamento di Integridad
Promer Minister sra. Evelyn Wever–Croes a duna di conoce cu dia 1 di oktober 2018, e departamento di integridad lo ser institui. Unda cu mester percura pa tur departamento cu ta encarga cu investigacion ta na nan lugar pa por traha structura y p’asina por hiba nan investigacion independientemente y percura pa investigacionnan cana liher y por tuma decision cu no mester tarda e proceso cu por perhudica e trahador. Den esaki ta hunga un rol importante un bon programa di conscientisacion pa e cuerpo di ambtenaar pa nan ta na altura di e funcion di e departamento y den esaki tambe ta hunga un rol cu esun na cabes di e departamento aki mester ta un persona integro cu lo sa di percura pa anonimidad di cada trahador cu ta trece keho di probabel mal funcionamento, cu por garantisa e persona honesto, integro aki cu su keho ta keda anonimo y unda esnan den e departamento por haci nan investigacion riba e kehonan aki. Pues cada ambtenaar ta ser spera pa traha como e bon ambtenaar unda ta traha den margen di su funcion y tambe den margen di ley.
Camber di integridad
E camber di integridad ta hopi importante pa por controla e funcionamento di nos gobernantenan y nan decisionnan tuma pa wak si nan ta cumpli cu tur regla. Den esaki tin 3 ley importante cu ta e ley di destaho publico, e ley di control financiero di partidonan politico y tambe e ley di screening/integridad di ministernan y minister plenipotenciario.
E ley di control financiero di partidonan politico ta hopi importante y di screening integridad di ministernan pa locual ta trata e destaho publico na Aruba. E mal custumber cu amigonan ta sponsor na grandi, of e mal custumber cu gobernantenan ta drenta casi na un set di bachi y despues ta sali den grandi, pa despues e amigo of sponsor ta gana destaho publiconan mester ta pa pasado. Cada compania, cada ciudadano mester tin oportunidad igual y husto di por participa y tin oportunidad igual pa gana un destaho publico. E ley di control financiero di partidonan politico ta exigi pa declara kende(nan) ta bo sponsor di bo partido y tambe di e candidato y e ta e base tambe pa por controla cu por ehempel un candidato cu ta declara cu el a haya na sponsor y tambe benta di cuminda etc, cu el a yega 60.000 florin, pero su campaña ta mustra uno di cientos di miles di florin, anto e ley ta duna e autoridad pa por haci un investigacion riba esaki.
E ley di control financiero di partidonan politico y ley di screening/integridad di ministernan y minister plenipotencario
Mi persona como parlamentario manera cu mi a drenta a dedica mi mes na e dos leynan aki. E ley di control financiero di partidonan politico ya a drenta y actualmente nos ta bezig ta treciendo e cambionan necesario conseha pa nos Raad van Advies, pa asina prome cu fin di oktober nos entrega e ley na Presidente di parlamento pa por trata esaki prome cu fin di aña 2018. Mientras nos ta warda ainda riba e conseho di Raad van Advies riba e ley di screening/integridad di ministernan y minister plenipotencario cu na momento e drenta nos lo haci e cambionan cu por ser sugeri pa nos entrega esaki na Presidente di Parlamento pa por trata esaki prome cu fin di aña.
Ley di destaho publico
E ley di destaho publico ta na parlamento y lo ser trata muy pronto. Esaki ta hopi importante pasobra pa prome biaha ta mara e procedura na leynan y pa haci esaki mas transparente posibel pa por garantisa cu e proceso aki ta cana transparente y duna cada compania/ciudadano e oportunidad husto pa por gana un destaho publico
Cambio pa bon gobernacion
Mi persona ta cumpli cu locual mi a priminti di haci for di awo caba y pa den futuro tur proceso cana na un manera transparente y percura pa tur proceso por cana segun esaki ta prescribi y no unda cu tin favoritismo. Ainda mi ta spera pa pronto tambe trata e ley di Ombudsman p’asina nos por sigui garantisa e ciudadano tambe mas proteccion. Y asina mi ta spera di por a cumpli cabalmente cu pueblo unda cu por sinti e cambio pa un bon gobernacion por ta garantisa pa hopi aña y hasta pa haci futuro gobernacion “LIBER DI CORUPCION” y sigur tambe EMAN PROOF.
