GABINETE WEVER-CROES A INSTITUI UN COMISION SPECIAL PA ANALISA VIOLANCIANAN DOMESTICO
Despues cu den luna di augustus Aruba a keda confronta cu un otro caso di abuso y violencia domestico cu a causa bida di un hende muher, Gabinete Wever-Croes a tuma e decision pa institui un comision pa traha riba e tema di violencia. Minister Glenbert Croes encarga cu asuntonan social, a tuma accion mesora y a presenta e idea di e maneho aki na Ministerraad.
Despues di e decision aki di Ministerraad di dia 28 di augustus, a bay sinta analisa e situacion di problemanan cu nos tin referente e violencianan den relacionnan, violencianan domestico, abuso contra muchanan y abuso contra hende muhe.
Ministerio di Asuntonan Social hunto cu Ministerio di Asuntonan General, Ministerio di Husticia y Ministerio di Salubridad, a coordina e comision aki. Directora di Sociale Zaken, señora Glenda Hernandez ta encarga pa ehecuta e proceso aki.
Prome Minister a duna di conoce cu e comision aki no solamente lo analisa e violencianan den un relacion, relacion di famia y relacion di pareha, pero tambe e lo ta encarga pa e relacionnan na pia di trabou, por ehempel di doño trabou cu trahado y na e scolnan entre docentenan cu mayornan entre otro.
E comision aki, segun e Premier, lo bay ta bastante amplio y ta consisti di un grupo di “stake holders” kendenan ta directornan di Departamento y Fundacionnan di Gobierno entre otro di Sociale Zaken; Voogdijraad; Fundacion Sostene Mi; Jeugdgezonheidszorg, Polis; Ministerio Publico; Comision di Derecho Humano; y Comision di Hende Muher den Dificultad. Nan na nan turno ta presenta nan conseho final Ministerraad, p’asina aki ehecuta e plan pa ataca e problematica di violencia.
Tareanan principal di e comision ta pa busca mas informacion y data. Nan lo bin cu un plan con nos ta preveni den caso di crisis pero mas importante con pa interveni ora cu tin problema. E comision lo cuminsa pa pasa riba e procesonan existente pa evalua con lo ehecuta e cambionan cu lo mester bin.
Gabinete Wever-Croes kier cooperacion y colaboracion entre tur e departamentonan concerni pa na un forma duradero, sostenibel y holisto integral atende cu e problema aki. Lo bin cambio di ley y cambio di maneho pa asina hunto nos por yega na un plan nacional cu ta combati violencia, specificamente contra muchanan, contra e parehanan, violencia domestico, violencianan den relacion. E plan nacional di Gobierno ta pa pone e fondonan disponibel pa por atende cu esakinan.
“Ta importante pa señala cu e problemanan social aki, ta e sintomanan di otro problemanan serio den comunidad. Cu e comision aki, Gobierno ta haya un indicacion con pa conbati e problema di violencia den stapnan firme y sigur”, Prome Minister Evelyn Wever-Croes a expresa.