Na 2017 nan a bay lagando un compromiso di 7 mil camber extra
Marisol Lopez-Tromp mirando cu den e dianan aki tin hopi discusion den comunidad riba e noticia cu lo bin un hotel nobo na Palm Beach, esta St. Regis, kier a trece claridad riba cierto declaracionnan y informacionnan cu a sali den publicidad.
Loke a resalta pa Lopez-Tromp ta cu for di diahuebs mainta por a mira un tendencia caminda di parti di AVP y tambe mensahenan cu ta wordo manda rond ta indica como si fuera ta su persona lo a firma pa compromete e tereno en cuestion unda e hotel lo wordo construi.
El a mustra tambe cu rond di 11or di mainta di diahuebs el a haya un mensahe manda door di Patrick Paskel di Tera Group. Ta trata aki di un documento cu el a distribui, un acuerdo bieu di aña 2006, cu e tempo ey Marisol Lopez-Tromp como minister a firma. Esaki el a haci a base cu e hoteleronan cu tabatin e tereno eynan den propiedad a pidi si nan por a haya un expansion pa construi loke nan kier a traha e tempo ey, esta timeshare. Loke nan a haci ta entrega nan propiedad na Pais Aruba, haciele erfpacht y nan a haya un pida adicional pa realisa nan proyecto.
E documento aki en berdad a wordo firma door di dje na 2006 cu aprobacion di Conseho di Minister, pasobra tur proyecto grandi cu tabata wordo haci den Gabinete Oduber tabata bay Conseho di Minister mirando cu hopi biaha nan tin di haber cu mas ministerio, manera den e caso aki Minister di Turismo, Minister di Medio Ambiente y Minister di Finansas.
E documento aki no ta di un hotel di 5 strea cu 350 camber, e documento bieu aki ta trata propiedad cu e hoteleronan tabatin di nan cu tabata destina pa turismo y cu nan kier a desaroya den un timeshare di 150 camber y cu e tereno propiedad di nan a wordo haci erfpacht pa haya un pida mas. E timeshare aki nunca a wordo construi y e tereno a keda den su forma natural.
Lopez-Tromp a enfatisa cu henter e zona aki di Palm Beach for di hopi tempo caba, hasta prome cu el a nace, tabata destina pa desaroyo turistico. Ademas, no ta un secreto cu na aña 2006, 12 aña pasa, cu den e programa di gobernacion di partido MEP tabatin cu lo bay construi hotel y bin cu mas hotel pasobra kier a stimula turismo como nos pilar economico. E tabata e forma cu a scohe pa sali for di un crisis y stimula nos economia. Tabatin tambe e proyeccion pa bin cu hotel na San Nicolas y na final di gobernacion e hotel Ritz Carlton.
Pero pa un hotel di 350 camber y casino ta e ex ministernan Sevinger y de Meza a firma un par di dia prome cu eleccion a tuma lugar na 2017, marando man y pia di e siguiente gobernacion.
Ta lamentabel pa mira con na 2009 ora AVP a drenta den gobernacion nan tabata kier moratorio riba camber di hotel y na 2017 ora nan a bay, a laga un compromiso atras di 7 mil camber extra.