Libertad di expresion y di haci cualkier trabou semper ta algo cu Partido MEP ta respeta di cada persona, esaki ta conta tambe pa periodistanan cu tur dia ta haci nan trabou pa informa pueblo treciendo noticianan al caso y berdadero. Libertad di expresion sinembargo, no ta duna e derecho di libertinahe pa expresa opinionnan unda ta trapa dignidad di e ser humano.
Partido MEP recientemente a informa señor Speed Andrade di 24ora.com cu e no ta bon bini mas na Cede di MEP. Motibo di e decision aki no ta pa stroba señor Andrade di haci su trabou di periodismo sino pa motibo cu señor Andrade cu e afan pa causa sensasionalismo ta trapa riba dignindad di personanan vulnerabel den nos comunidad.
E incidente di diaranson 5 di september ultimo na unda cu despues di Conferencia di Prensa di Fraccion di MEP na Cede di MEP na Santa Cruz, a yega un persona di edad y obviamente malo y hopi bruha. E tabata hisa y baha su carson. Tawata obvio cu e persona masculino aki no tabata sa kico e tabata haci. Speed Andrade a haya ta bon pa filma y saca su potret di e persona aki apesar cu esnan encarga cu Cede a suplica Speed pa no publica nada.
Pero Speed cu un actitud arogante a demostra indeferencia y sin importa dignidad di e persona, toch a filma y saca potret di e persona pa despues e subi e video na su pagina di noticia 24ora.com, cua pagina ta conoci caba pa causa sensasionalismo den pueblo.
Partido MEP no por permiti e cosnan aki pasa na su Cede. Cede di MEP mester ta un luga cu tur hende ta sinti siguridad pa busca ayudo. Tanten cu Speed ta bishita Cede, MEP no por garantisa un trato digno na tur bishitante y p’esey mester a tuma e medida aki.
No ta prome biaha cu Speed Andrade ta falta respet na dignidad di e ser humano djis pa causa sensacion. Partido MEP no ta acepta esaki y no lo permiti esaki pasa mas den su Cede.
Pabien na partido MEP pa tuma e paso importante aki. E ser humano ta central!