Recientemente den un reunion publico nos den parlamento a aproba diferente comision pa 2018-2019. Pero lamentablemente un biaha mas por a tuma nota cu fraccion di AVP ta bolbe hunga e mesun politica anticua, unda nan ta sali bin pafo y bay prensa y awendia facebook pa bisa cu a trapa nan derecho democratico y mi tin sigur cu pronto nos lo wak nan bay cu carta na gobernador, y despues Hulanda, pasobra esaki ta nan modus operandus di hunga di victima pa pueblo y pa Hulanda kere nan. Kizas esnan cu no a sigui politica ultimo 20 aña no sa e modus aki pero ami sigur si a sigui nan di cerca y sa con nan ta maniobra.
Presidencia comisionnan pa AVP
Laga nos papia cos manera cu e ta. No ta pasobra nan a trata MEP den pasado malo unda tin añanan nan no a duna MEP ningun posicion den comisionan of a duna pero durante aña a kita esaki, nos lo haci mesun cos. P’esey pa aña 2017-2018 nos a percura pa fraccion di AVP tin dos Voorzitter cu tabata sr. Robert Candelaria pa Transporte y Comunicacion y sr. Richard Arends pa e comision di NV-nan di Aruba y 3 Vice Voorzitter cu tabata sr. Michael Lampe (deporte), sra Jennifer Arends-Reyes (sector Primaria) y sr. Richard Arends (Finanzas y Economia). Pa aña parlamentrario 2018-2019 nos a bisa e Fraccion di AVP cu nos lo mantene e mesun formato anterior, pues di dos Voorzitter y 3 Vice Voorzitter, pero lo cambia e Voorzitter di NV- nan pa esun di Husticia cu colega sr. Rocco Tjon tabata voorzitter pero a ofrece pa duna esaki den miras cu Fraccion di AVP tabatin un ex Minister di Husticia den nomber di sr. Arthur Dowers.
Kico a pasa?
Mi persona a haci peticion pa por bira e voorzitter di e comision di NV- nan den bista cu mi tabata henter aña bezig cu esakinan y den bista cu sr. Richard Arends no a haci su trabao debidamente y no a yama ni un reunion y den bista di e importancia pa pueblo cu nos NV-nan ta funciona debidamente a pidi e cambio. Fraccion di AVP a nenga rotundamente pa e cambio y a hari y burla di e proposicion di nan colega sr. Arthur Dowers como voorzitter y bisa cu e cartera no ta interesanan y na nan postura tabata claro cu nan no ta confia nan colega y sigur a duna un desconfiansa total den su ex maneho como Minister di Husticia. Na e momento ey Fraccion di AVP a pone pia abao y bisa cu si no dunanan e Voorzitter di NV- nan, nan no ta interesa den ningun otro comision como voorzitter y nan no lo tuma nada. Na e manera agresivo cu sr. Richard Arends y Fraccion di AVP a purba pone cuchiu bao di nos garganta pa nos haci nan kier di dunanan e comision di NV-nan, hamas nos lo a acepta esaki.
Y p’esey nos a bisanan cu si esaki tabata nan decision di no tuma ningun posicion clave den e diferente comisionnan, cu esaki tabata nan escogencia, pero nos hamas lo sucumbi pa nan kier. Pues e decision di Fraccion di AVP tabata uno boluntario y haciendo esaki tabata nan mesun escogencia y awo no por bin yora cu nos a trapa nan derecho y cu democracia no ta ser respeta. Pero netamente e base boluntario aki ta un di e puntonan importante pa por conserva democracia y Fraccion di AVP a haci uso di e derecho aki.
Pakico tanto interes?
E manera agresivo cu sr. Richard Arends a bira tabata muestra cu sea e tin miedo of tin hopi cos mas di sconde pa pueblo den e NV-nan. Kizas nan no tabata kier pa nos sigui investiga kico a pasa pa 8 aña cu Hedging, Green Conferencenan, proyectonan aventurero cu a costa nos hopi placa of kizas tin hopi mas cu 574.000 florin cu nos a constata cu solamente Utilities a paga na Horizon Consultancy tempo cu sr. Richard Arends tabata director y sin conta locual nos a haya di sr. Richard Arends cu a strica di gobierno como consultancy cu muy pronto na momento cu e restante di preguntanan ser contesta, nos lo duna pueblo un totalidad di placa cu sr. Richard Arends a strica di pueblo cu ta core den un par di miyon. Kizas tin mas recibo cobra scondi? Kizas no kier nos haya su rol completo den Green Conference? Of tin mas Ministernan of e mes como consultant pa e supuesto reapertura di refineria? Pues na su actitud mas cu nunca a haci mi mas curioso pa sa mas kico a ser haci cu placa di pueblo den e NV-nan di Aruba. Y p’esey nos a manda caba pidi e prome reunion cu Minister di Asuntonan General unda cu e NV-nan ta cay y asina nos lo sigui pa yama cada NV pa nos sa con cos ta y sigura pueblo cu nunca mas sinberguenseria lo tuma lugar den nos companianan estatal.