Parlamentario Endy Croes no lo laga ningun gañamento of manipulacion di AVP pasa sin cu e reacciona. Primordialmente di un tipo cu a causa un desaster den su maneho di husticia. Nos tur por corda cu nunca e tabata tin un plan y su resultado di e desaster cu el a causa ta veridico y visibel tur caminda. Den dicho articulo Dowers ta splica textualmente “Mi a tende un Minister declara cu tabata tin solamente 2000 florin presupuesta pa Landsrecherche por haci biahenan di trabao”. Tambe den e mesun articulo Dowers a continua bisando ”Ta un declaracion ridiculo ya cu Landsrecherche su trabao no ta pa biaha pero pa investiga”. Esaki ta splica claramente e mentalidad di AVP, esta hancho pami y smal pa bo.
Paranda cu placa di pueblo
Dowers tabata tin riba su propio presupuesto di dienstreizen di cual un suma di 270 Mil florin pa su persona como Minister biaha den 2016 y 2017. Dowers tabata di paranda cu placa di pueblo. Pregunta cu ta lanta mesora ta e acusacion di Dowers liña recta contra Landsrecherche cu nan trabao ta pa investiga y no pa biaha. E trabao di Dowers si ta pa biaha? Of ta pa traha y mantene entre otro ordo publico y seguridad aki na Aruba? Dicon Dowers si por a harasa 270 mil florin y a keiro rond mundo sin bini bek cu net net nada cu lo por a sirbi nos pais? Dicon Landsrecherche no por bay Congresonan y ricibi upgrading cu tecnologianan mas moderno?
Destruccion di radarnan
Mesun Dowers aki a kibra e contract cu e Helicopter desde 2011 unda awe Aruba mester pasa den henter un proceso nobo pa logra un Helicopter bek pa yuda controla nos costanan primordialmente den e momentonan mas dificil actualmente cu e situacion conoci di nos pais bisiña. Mesun Dowers aki cu bendicion di Mike Eman y AVP a scoge pa “DESTRUI” e RADARNAN cu nan a haya funcionando cual RADARNAN tabata gara tur botonan chikito desde cu nan sali di costa di Venezuela unda Guarda nos Costa por a atende cu nan promer cu nan yega tera. Vision di Dowers y Mike tabata contra tur proyecto di Minister di Husticia di MEP e tempo aya esta Rudy Croes. Pues mester destrui tur locual MEP a laga atras. Dieptriest. Kapitaalvernietiging. No ta di Dowers su saco a paga pa e RADARNAN aki y p’esey no a import’e un bledo pa destrui nan. Tin biaha mi ta puntra mi mes si Dowers tin poco amor pa Pais Aruba.
Atraco y ladronicia
Bao Dowers su maneho tabata tin atraco casi tur dia y robo di auto tur dia y criminalidad a aumenta barbaramente. Aun cu e situacion ta hopi diferente actualmente pa e motibonan conoci por mira un Gobierno trahando cu alma y cuerpo pa garantisa seguridad di nos pueblo. Minister Andin Bikker haciendo tur esfuerso y RADARNAN y HELICOPTER lo ta bek promer cu fin di aña cu Dowers kier of Dowers no kier pero no por pone emocionnan di Dowers dilanti henter un pueblo. Dowers a faya barbaramente como Minister di husticia y pueblo a reken af cune. Dowers ta manera den un vakantie eterno. Endy Croes ta termina bisando Dowers cu bo por a faya como Minister pero awor como Parlamentario stop di haci cos di sinberguensa y cuminsa presenta na trabao. Si bo tabata un hende honesto momento bo salario drenta fin di luna lo tabata na su lugar pa bo debolbe pueblo bek esaki.