Diamars merdia tabatin e apertura di e conferencia di enseñansa secundario bilingual basa riba idioma materno, “Construyendo Futuro’ na Universidad di Corsou, organisa pa SKAIH Pre Universitario, unda Parlamentario Sue-Ann Ras (MEP) tabata invita.
E conferencia a inicia cu un presentacion di tributo special na 4 persona, cu a nifica masha hopi mes pa desaroyo di idioma Papiamento den enseñansa y comunidad na Corsou: Drs. Eric La Croes, Drs. Renny Maduro, sr. Philip Nieuw y e fundador di Fundacion pa Skol Humanista na Papiamento, prof. dr. Frank Martinus Arion, cu tambe ta e autor di e buki masha conoci den examen klas: Dubbelspel.
Prof. James Cummins, ta considera como un di e expertonan den e mundo di investigacion y implementacion di enseñansa bilingual na Canada y otro pais. Banda di esey prof. James Cummins ta co autor di diferente buki tocante alfabetizacion den enseñansa.
Mester remarca cu e atardi tabata hopi interesante, relevante, informativo y motivante, mirando e oradornan profesional riba e tereno di linguista y enseñansa bilingual. “E enfasis tabata riba e gran importancia di idioma materno den enseñansa, specialmente e prome 8-10 añanan, pa garantisa compromiso di e muchanan cu enseñansa”, Ras a indica. “Remarcabel ta, cu durante e presentacion por a mira hopi cla un semehansa cerca e isla- y paisnan colonisa, unda cu comunidad y esunnan cu a traha ley frecuentemente a opta pa e lenga colonial como e instrumento principal di instruccion, en bes di scoge p’e idioma di comunicacion diario”, Ras a sigui bisa.
Identidad y cultura tambe a sufri su consecuencianan. “A conclui cu nos no por lubida cu identidad ta relaciona cu idioma y cultura y con e mucha ta wak su mes. Ta importante pa cuminsa realisa cu idioma, bo no por siña como un materia individual, pero mester ta mas holistico. Mester uza idioma como un instrumento pa crea identificacion potente cerca nos muchanan”, Ras a sigui bisa.
Aruba tambe tabata bon representa cu e caranan conoci den e mundo di enseñansa multilingual y Papiamento, unda cu nan tambe a comparti nan experiencia y experticio.