147
Sasaki – Dialuna 2’or y 45 di marduga, polis y brandweer a wordo notifica di un candela hopi grandi na Bubali Plas.
E Patruya cu tawata bayendo pa e candela por a nota for di leu cu ta trata di un candela gigantesco. E agentenan a pidi mesora pa presencia di no un sino pa varios truck di Brandweer, mirando e grandura di e candela.
Na rand di Sasaki
E candela a cuminsa na rand di e caminda di Sasaki. Y den un tempo hopi liher, a plama bay direccion pabou y na momento cu ela yega na e awa, ela desvia bay nort.
Sr. De Cuba Commandante di Brandweer
Den un combersacion cu Commandante di Brandweer Sr De Cuba, nos a compronde cu e candela no por a cende su so.
Sr De Cuba a splica tambe, cu a haci uso di drones, pa por a mira con e candela tawata “cana”.
E no tawata un candela facil pa domina, mirando cu ta dificil pa por a yega na dje.
E candela a cana manera un letter L, pues e no por a sigui bay pabou door cu tin e awa.
Una bes cu ela yega pabou, ela coy direccion nort, pues direccion di area di Riu Hotel.
Den oranan di merdia ainda e ultimo pida tabata na candela
Den careda di 12;or y mey , reportero di Arubanative.com a bay na e sitio unda e ultimo parti ainda ta kimando, a topa cu bomberonan cu tawata trahando for di oranan di marduga, na momento cu e candela a cuminsa. Temperatura halto y solo tawata hungando un rol grandi tambe, bomberonan tabata mustra hopi cansa.
E ultimo pida cu tawata kimando no tawata facil pa yega, mirando cu e ta asina cera door di e vegetacion.
Asina mes Brandweer tawata keda manda awa den direccion pa e por paga, mirando e molester grandi cu ela causa caba na e hotel y condominionan parti pabou.
E Butterfly Farm tambe a haya molester di huma y tabata cera awe.
Director di Rampenbureau y di D.O.W. y City Inspector tabata na e sitio
Na e sitio tawata tin Sr Rino Hermans di Ramperbureau, a presenta pa si mester activa un plan por si acaso algo bay completamente robes.
Tambe nos a tuma nota cu D.O.W su director tambe tawata presente y tambe City Inspector.
Mester evita pa den futuro un candela asina ripiti
Na final Sr De Cuba a bisa cu lo sinta mas lihe cu ta posibel cu director di D.O.W pa traha separacionnan den e plas pa si algo asina ripiti e candela no por sigui plama y causa daño grandi manera esun aki.
No ta conoci cuanto parha y otro animalnan cu ta biba eyden a muri. Nos a mira algun parha hopi cansa, altura di e toren unda nos tawata.
Un bunita gesto di gerencia di Riu hotels Aruba
For di oranan di marduga e bomberonan, tawata combati e candela gigantesco aki. Den oranan di dia den solo y den cayente di e candela, e gerencia di Riu Hotel ta trece bebida y sandwich pa e bomberonan na e sitio. Un bunita gesto di e gerencia di Riu Hotels, mirando con calor tabata haci y con cansa e bomberonan tawata di trata na combati e candela aki.