ORANJESTAD – Departamento di Asunto Social (DAS) kier informa e comunidad di Aruba specialmente tur cliente di bijstand cu dialuna awo 10 di september y diamars 11 di september, no ta bay tin servicio di bijstand na DAS su oficina situa na San Nicolaas. Esaki kiermen cu tur cliente di bijstand pa tur servicio di bijstand, mester acudi riba e dianan menciona na DAS Oranjestad. Tur otro servicio di DAS ta sigui normal na DAS su oficina situa na San Nicolaas.
Dialuna di blokeo
Dialuna awo ta e dialuna di blokeo despues di pago di bijstand di luna di september y DAS ta sperando mas o menos 350 cliente. Enconexion cu e dia aki, DAS ta haciendo su maximo esfuerso pa acomoda tur cliente mas eficiente y confortabel posibel poniendo tent pa tur persona cu mester warda riba nan turno parti pafo. DAS kier purba acomoda e clientenan di bijstand den sombra y asina alivia un poco e ‘heat wave’ cu Aruba ta experenciando. Por ultimo ta hopi importante pa tur cliente tin tur documento necesario na man, pa asina facilita e servicio.
Departamento di Asunto Social ta pidi tur cliente di bijstand pa tene bon cuenta cu e informacion importante aki pa asina evita cualkier situacion menos agradabel.
Pa cualkier pregunta por tuma contacto cu Departamento di Asunto Social seccion bijstand na telefon 528-1110.