Te awo nuebe persona deteni den Seroe Colorado cu a drenta nos isla ilegalmente via lama
Seroe Colorado: Diasabra den careda di mey anochi, un rato despues cu Kust Surveillance a haci su control den Colony, momento cu nan ta saliendo for di Colony, nan tras, na Rodger’s Beach ta drenta un lancha procedente for di Venezuela, e ta baha un cantidad desconoci di persona, nan ta yega tera na altura di e condominuim den construccion banda di e trapi na Rodger’s Beach.
Polis atento ta detene e prome ilegal
Den careda di 1’or un patruya atento di San Nicolas ta mira varios persona canando den area di pabou di e Misa den Colony, ora e hendenan a mira polis, nan a core. E polisnan den e patruya mesora a core nan tras y a logra detene un homber, segun e homber aki nan tabata 25 persona den e lancha cu lo a drenta ilegalmente.
Den oranan di marduga pa mainta constantemente polis tabata patruya den Colony.
Otro patruya atento di San Nicolaas ta detene un ilegal
Den oranan di mainta un biaha mas un patruya di San Nicolas ta detene un homber, e homber aki a contradici e prome persona cu a keda deteni, segun su persona nan a yega den un lancha chikito y cu nan tabata 8 persona cu a subi tera.
Buskeda pa ilegal
For di oranan di mainta patruyanan di San Nicolaas, e team di recherche di San Nicolaas, tambe un unidad di K9 y Guarda Nos Costa a cuminsa cu un buskeda den e area di Colony.
Den oranan di mainta Guarda Nos Costa tambe ta logra detene dos persona den e area pariba di e Misa den Colony.
Durante e buskeda, un security guard di e refineria a mira 4 persona ta move den un mondi bandi pariba di e cura di e refineria, mesora ela avisa polis.
Recherche di San Nicolas ta drenta mondi na pia y ta pone man riba dos ilegal mas
Mientras e team di recherche a drenta e mondi aki na pia en busca di e ilegalnan, e patruyanan di polis tabata keda patruya rond den e area di Colony.
Algo pasa di 12’or y mey di merdia, e team di recherche ta canta bingo, den e mondi cu nan tabata buscando nan ta logra pone man riba dos persona mas. Mesora ta pidi asistencia di transportwagen y tambe Guarda Nos Costa.
Polis di San Nicolas ta sigui piki mas persona cu a drenta ilegal nos isla
Den careda di 2’or y 15 un patruya di San Nicolaas ta bolbe pone man riba 2 persona banda di e cura di Citgo, mesora a pidi transportwagen pa transportanan pa warda di polis.
3’or y 15 atardi polis ta bolbe detene un persona banda di e cura di Man Kamp, esey ta full pariba y bandi panort di e cura di e refineria.
No ta conoci exactamente cuanto a drenta
NO ta sigur cuanto persona a drenta paso e informacionnan ricibi ta contradici otro,un a bisa 25 y e otro a bisa 8, of no ta descarta e posibilidad cu por a drenta dos boto.
E ilegalnan ta pasa den mondi panort di Centro Colorado y pariba di ManCamp bay direcion panort pa sali for di Colony
E personanan aki ta drenta riba beach y ta core bay sconde den e mondi bandi patras di Centro Seroe Colorado y den e mondi banda di e Man Camp di e refineria, paso eynan nan ta cana bay noord bula e cura y sali pafo di e cura di Colony, cana bay of nan ta wordo busca pa localnan cu ta yudanan.
Patruya di San Nicolas ta den Colony y ta sigui busca pa mas ilegal, te na e momento nan aki tin 9 persona sigur deteni.
Negoshi di Traficacion di hende ta sigui florece
Tanten cu nos costanan no ta completamente cera, e negoshi di traficacion di hende lo sigui florece. Na nos pais bisiña e pueblo ta pasando den su peor momentonan y hopi ta sali en busca di un mihor futuro, pero entre e bon nan, tin malo tambe cu ta trata na drenta nos isla ilegalmente of ta trece cosnan ilegal cu nan manera arma y droga, paso no tin control kiko ta drenta ilegalmente.
Segun gobierno nan ta trahando pa pronto keda cla cu Helicopter y radar pa detecta e tipo di lanchanan aki, ban spera cu ta pronto y no ta esey so mester tin suficiente blauw riba caya pa combati ilegalidad.
Bon trabou di autoridad
Danki na e team di recherche di San Nicolas, e patruyanan atento di San Nicolaas, unidad di K9, team di Guarda Nos Costa y localnan atento cu ta yama y ta avisa polis unda tin ilegal scondi, autoridad local a logra detene 9 persona cu a drenta nos isla ilegalmente.