ORANJESTAD – Departamento di Asunto Social (DAS) a tuma nota cu ultimamente diferente informacionnan eroneo tocante servicionan cu ta ser ofreci, ta wordo publica riba Social Media. Pa e motibo aki, DAS ta desea di informa e comunidad di Aruba mas tocante e servicio cu ta ser duna pa nos trahadonan social.
Ayudo di un trahado social
E trahado social ta ofrece sosten, conseho y guia na clientenan cu pa un of otro motibo ta den un situacion dificil.
Algun ehempel di ‘hulpvragen’ (ayudo pidi)
Algun ehempel di ‘hulpvragen’ ta pregunta of problema tocante vivienda, den cual nos ta traha hunto cu FCCA, conseho of ayudo tocante e cliente su situacion financiero, conseho of ayudo den un situacion dificil y problema entre pareha y/of problema den famia of entre bisiña.
Ki tipo di ayudo ta wordo ofreci
E trahado social na Departamento di Asunto Social por ofrece di duna informacion y conseho, yuda e cliente compronde su situacion, formula metanan y un plan hunto cu e cliente, guia e cliente pa anda miho cu su situacion, intermedia pa e cliente cu un otro instancia y/of referi cliente pa e instancia corecto dependiendo e problematica.
Kico nos ta spera di nos cliente?
E trahado social no ta duna e solucion na e cliente, pasobra Departamento di Asunto Social ta kere cu e cliente mes tin cu traha pa e solucion. Nos ta sostene e cliente riba e caminda pa yega na e solucion. Pesey Departamento di Asunto Social ta spera di e clientenan cu nan ta duna tur informacion necesario y traha tambe activamente na e solucion. Na final di dia e responsabilidad ta di cliente mes.
Departamento di Asunto Social ta yuda tur persona igual y sin discrimina, te na unda por. E cliente na su banda mester demostra e interes pa kier sali for di su situacion actual, pa asina por sigui riba su mesun pia despues. Sa pasa cu clientenan a yega di haya tur ayudo den e alcance for di Departamento di Asunto Social pero no ta demostra di su banda e responsabilidad necesario pa por progresa den bida riba su mes. Akinan ta caminda cu hopi bes informacionnan eroneo ta cuminsa circula for di un banda so, creando un pensamento eroneo den comunidad pa loke ta servicionan cu DAS ta brinda.
Pa mas informacion tocante e servicio di guia social na Departamento di Asunto Social por tuma contacto na telefon 528-1100.