Parlamentario Alan Howell ta sumamente contento y satisfecho cu e mocion presenta pa su persona durante reunion publico di Parlamento diamars cu ta contribui na aumenta siguridad pa nos pueblo y nos bishitantenan a wordo aproba unanimamente. Ademas Minister di Husticia a mustra tambe cu e ta positivo pa cu e mocion.
E ta indica cu e ta conciente cu pueblo ta spera lo miho di dje como persona y parlamentario y pa tal motibo tambe ta su deber pa traha duro y trece cambio pa nos pais. “Cu sumo placer mi por informa cu ayera durante e reunion publico den Parlamento, mi a presenta un mocion den nomber di fraccion POR cu por cierto a wordo sosteni en grande pa tur fraccion, esta fraccionnan di MEP, RED,AVP y POR”.
E mocion ta pa urgi gobierno pa studia e posibilidad pa bin cu un accion pa tur esnan cu tin arma di candela ilegal den nan poder, pa entrega esaki na warda di Polis sin wordo castiga pa ley. Hopi aña pasa e accion aki a yega di tuma lugar y e tabata un exito.
E mocion ta considera cu den pasado a duna oportunidad na pueblo pa entrega armanan di candela sin wordo persegui penalmente; cu e accion aki a resulta un exito y a trece trankilidad bek den comunidad; cu un di e puntonan principal di maneho di Gabinete Wever-Croes ta combati criminalidad y cu siguridad di nos comunidad y di nos bishitantenan ta un prioridad. Y ta dicidi pa urgi gobierno pa studia e posibilidad pa bin cu un tipo di ‘pardon regeling’ pa esnan cu tin un arma di candela ilegal den nan posesion y ta haci entrega di esaki na nos Cuerpo Policial durante un periodo predetermina, logrando asina un reduccion di armanan di candela den nos comunidad.
“Cu mi experiencia den e materia di husticia mi ta sigur cu e accion aki nos lo por elimina hopi arma di candela ilegal for di riba caya evitando asina casonan lamentabel di asesinato y atraconan cu arma di candela. Esaki sigur lo ta un manera pa yuda trece trankilidad bek ariba nos dushi pais Aruba”, Alan Howell a duna di conoce.