Diahuebs mainta a cuminsa un reunion publico den Parlamento cu tur minister presente pa duna na parlamentarionan un resumen di cuanto placa a wordo uza di e presupuesto 2018 pa asina representantenan di pueblo haya un bista en general di loke tin disponibel, loke a wordo uza y lo ke tin pa wordo uza ainda.
Lider di Fraccion di POR, Marisol Lopez-Tromp a enfoca hopi riba e aspecto di capital humano den e aparato publico y a para fuerte pa haya contesta di cada minister riba e inversion cu ta wordo haci den personal di aparato publico.
Gran parti di su disertacion inicial a bay riba e post di opleidingen en cursus geld (placa presupuesta pa formacion y curso), cual den su gran mayoria no a wordo uza te na e momentonan aki. E placa presupuesta ta dirigi pa capacitacion of recapacitacion di e aparato publico. E post aki ta un di e aspectonan importante pa percura pa empleadonan publico keda haya nan cursonanan pa nan keda up to date. Aunke cu aña no a caba ainda, por wak cu di e suma total cu tin pa aña 2018 cu ta un poco mas di 2 miyon, apenas un 17.9% lo por a wordo uza, faltando ainda un gran cantidad di loke tin presupuesta.
Marisol Lopez-Tromp ta indica cu awendia no ta bay di mes cu despues di tanto aña e empleado publico ta haya su bevordering, ta wak e esfuerso den e trabou, e input y ta husga muy en particular pa diferente departamento si a cumpli cu cierto exigencianan di educacion. Tambe por ta cu e trahador a yega su top, pero ta wordo bisa cu si e kier sigui crece, e mester haci tal y tal opleiding. Pa tal motibo ministernan y directornan di departamentonan tin cu percura pa empleadonan publico por haci esakinan y asina por duna un miho servicio na pueblo, specialmente si tin e placa aki disponibel riba presupuesto y no pa e placa aki bay pa otro postnan cu no ta opleidingen en cursus.
Mirando cu loke a uza pa e aña aki ta solamente 17.9%, Lopez-Tromp a repasa e presupuesto di cada minister te cu awor aki pa e post di opleidingen en cursus geld.
Pa loke ta e Ministerio di Asuntonan General, te na e momentonan aki nan a uza 11.2% di e post opleidingen en cursus. Un suma di casi 20 mil uza di un total di casi 180 mil.
Pa Ministerio di Infrastructura y Medio Ambiente por wak pa e post di opleidingen en cursus geld tin 1.4% uza, un suma di mas o menos 2 mil for di un suma di 140 mil.
Ministerio di Transporte tin 4.4% uza, kiermen apenas 9 mil di 196 mil mas o menos.
Ministerio di Turismo, Salubridad y Deporte a uza 2.4% pa loke ta opleidingen en cursus geld, 3 mil Florin di 124 mil.
Ministerio di Asuntonan Social a uza solamente 1%, 428 di 41 mil.
Ministerio di Enseñansa tin 4.7% uza casi 7 mil Florin di 142.700 cu tin disponibel.
Ministerio di Husticia, a uza 12.1% cu ta un poco mas di 80 mil cu a wordo uza di 664.200.
E Ministerio cu mas a haci uzo di e post aki pa su trahadornan ta e Ministerio di Finansa y Economia, 38.4% cu ta representa casi 274 mil di 712 mil.
Pregunta di Marisol Lopez-Tromp na cada minister ta kico ta e planning pa opleidingen en cursus geld pa resto di aña pa por uza e suma presupuesta pa e respectivo ministerionan? “Si nos ta kere den nos hendenan y nos kier pone nan central, nos mester hacie tambe pa e parti di educa y reeduca nos empleadonan publico”.
E ta spera cu en berdad e placa presupuesta wordo uza pa capacitacion y recapacitacion di e empleadonan publico, invirtiendo asina den nos capital humano y mehorando e servicio cu ta duna pueblo en general.
