Despues di un pauze di dos aña largo Stichting Monumentenfonds Aruba ta organisa un biaha mas WIKI LOVES MONUMENTS ARUBA 2018.
Den e ultimo añanan Monumentenfonds Aruba a haci hopi inversion den mantencion di nos edificionan monumental pa cual nan tur ta den top condicion actualmente y ta considera esaki e momento ideal pa un competencia di fotografia un biaha mas.
Wiki Loves Monuments ta un competencia di fotografia internacional cual a yega di gana e record guiness como e competencia mas grandi di fotografia na mundo. Na 2010 pa prome biaha hulanda a organisa Wiki Loves Monuments cual ta un iniciativa di Wikimedia. Na 2011 e competencia a expande na diesocho pais den Europa y na 2012 e competencia a bira uno global cu participacion di mas di trinta pais. Na 2013 Aruba a participa pa prome biaha y e aña aki lo ta participando pa di cuater biaha na e di ocho edicion di WIKI LOVES MONUMENTS.
E meta principal ta pa amplia e contenido di informacion tocante monumentonan como parti di e herencia cultural di Aruba riba Wikimedia. E idea ta pa despues tur e fotografianan aki haña articulonan cu informacion tocante di e monumentonan.
Tur paisnan participante rond di mundo lo organisa nan competencia di fotografia durante 1 pa 30 di september y di akinan nan lo nomina 10 fotografia pa participa na e competencia internacional caminda lo scohe un ganador absoluto.
E reglanan pa participa ta lo siguiente:
E fotografia mester ta di un monumento proteha di Aruba.
Mester upload e fotografia participante entre 1 y 30 di September.
Pa upload mester bai na e link riba e facebook page di Stichting Monumentenfonds Aruba.
E participante mester ta e autor di e fotografia.
Participacion ta gratis y pa tur edad.
Tur e fotografianan lo ta liber pa uso publico despues di e competencia.
E number di fotografia pa participa ta ilimita.
SMFA lo tin un hurado consistiendo di 3 miembro cual ta inclui un fotografo professional cual lo scohe e ganador a base di e siguiente criterianan:
Calidad tecnico
Originalidad
Fotografia ta di un monumento di Aruba
Esaki ta un oportunidad pa sali keiro cu famia bishita e monumentonan di Aruba, fotografia y upload e potret pa participa pa gana mil florin!
Pa mas informacion tocante Wiki Loves Monuments por bishita nos pagina di Facebook cual ta Stichting Monumentenfonds Aruba.
