142
Oosterhout, Noord Brabant, Hulanda:
Dialuna autoridad belgo a intercepta 3500 kilo di cocaina den waf na Antwerpen, riba e mesun dialuna polis a detene na Oosterhout 3 homber y un muher y na Woerden a detene un homber di 31 anja, tur a keda deteni como sospechosonan principal.
Landelijke Eenheid van de Politie a duna di conoce diamars merdia. E droga confisca aki tin un balor riba caya di 175 miyon Euro y ta core den e top 5 nan di mas hopi droga confisca den e ultimo anjanan.
Dialuna autoridad Hulandes a haci un entrada hudicial na e compania di transporte Van Wanrooij na Oosterhout caminda e detencion nan a cay.
Douane riba waf na Antwerpen a descubri e droga den un container di bacoba, procedente di Sur America, e cargacion di bacoba tabata tapa y camufla e cargacion di droga. E container tabata destina pa e compania di transporte aki.
E container cu permiso di autoridad no a wordo confisca mesora, pero a laganan bay cune na e compania di transporte, caminda autoridad a haci un entrada hudicial y a detene e chauffeur di e truck, mas e director di e compania y mas un homber y un dama. Un rato despues a detene un persona mas, esaki a sosode na Woerden, cu ta un homber di 31 aña biba na Rotterdam.
Diahuebs awo tur 5 lo mester presenta dilanti Rechter Commisaris.
