Un plataforma di innovacion unico den region
Minister President Evelyn Wever-Croes ta anuncia e lansamento di Futura Lab. Futura Lab, ta un lab di innovacion y ‘think tank’ di Gobierno di Aruba cu e meta pa forma e brug entre sector priva y sector publico. Asina lo crea un ambiente cu ta stimula capacidad innovativo y intelectual di nos pais. Futura Lab lo ta encarga cu ehecuta e plan di innovacion di Gobierno pa desaroya un futuro di Aruba ancra den innovacion cu e ser humano central. E ultimo lunanan Futura Lab a lansa diferente proyecto y iniciativa riba e area di innovacion. Diferente tayernan y reunionnan cu varios departamentonan di gobierno y sector priva a wordo teni pa trece un dialogo habri pa determina kico ta e necesidadnan mas grandi cu tin riba nos isla. Entre otro, den luna di juni a organisa e ‘Innovation Summit’ unda sector publico, priva, civico, y academico a bini hunto pa discuti varios tema di prioridad pa nos pais.
Desde cu Gabinete Wever-Croes a asumi e maneho di pais Aruba, a constata un gap grandi den e area di innovacion den gobierno mes y den maneho pa cu esaki. E falta di maneho structural di innovacion ta un di e causanan cu nos economia a keda stagna. Nos mundo ta cambiando hopi lihe. Tecnologia lo hunga un rol primordial den futuro desaroyo di nos pais. Esaki ta trece hopi incertidumbre. Nos muchanan lo traha trabounan cu no ta exisiti ainda y nos sector laboral lo tin mester di habilidanan nobo.
Pa e motibonan aki, e unico manera pa Aruba por sigui crece y progresa ta pa catalisa un economia cu innovacion y crea un manera nobo pa stimula nos crecemento socio-economico. Awe Gobierno ta anuncia un plataforma nobo Futura Lab cu lo ta encarga cu diferente aspecto di innovacion riba nivel gubernamental.
Un di e prioridadnan mas grandi ta pa transforma gobierno den uno digital, y haci e-Government un realidad. Digitalisacion di gobierno, aki por pensa riba un ID digital, pago online, servicionan di gobierno online, modernisacion di nos leynan, entre otro. Lo crea un ‘roadmap’ pa por desaroya un plataforma nobo cu lo haci servicionan di gobierno mas eficiente, cu lo yuda baha gasto, y tambe duna un miho servicio na ciudadanonan.
Proyectonan di Futura Lab
Mobile Makerspace
Un di e proyectonan cu ta den desaroyo den colaboracion cu Biblioteca Nacional y Metabolic Foundation (conoci pa Brenchie’s Lab) ta e Mobile Makerspace. Mobile Makerspace ta un proyecto innovativo y sostenibel, y ta encera un bus, ekipa cu e ultimo tecnologianan entre otro 3D printers, computers pa coding, Internet-of-Things, y robotics. E proyecto aki lo inicia den e siguiente lunanan y lo cuminsa bishita diferente scolnan na nos isla. Ademas di e Mobile Makerspace, Futura Lab conhuntamente cu Biblioteca Nacional lo yuda pone e Bibliobus bek riba caminda pa cuminsa bishita nos scolnan. Ademas, Futura Lab ta trahando hopi cerca cu Metabolic Foundation y Bibloteca Nacional pa crea pa prome biaha un maker space fiho na Biblioteca na Oranjestad unda cu muchanan lo por participa den diferente programanan tecnologico durante aña. Esaki lo garantisa cu e programa nacional di maker space ta uno duradero.
Kids 4 Bytes
Mas recien a organisa un prome coding camp ‘Kids 4 Bytes’ sumamente exitoso. Durante e camp aki muchanan di 7 pa 13 aña por a siña con pa traha nan mesun wega riba computer. Ademas di duna e muchanan algo educativo pa haci durante vakantie, nan por a siña habilidadnan nobo (’21st Century Skills’), manera traha den team, liderasgo, y soluciona problema door di pensa critico.
Innovacion Social pa Juventud
Ademas di tur e iniciativanan aki, Futura Lab ta brinda nan apoyo na diferente organisacionnan civico cu tey pa stimula e capacidad intelectual y social innovativo di nos jovennan. Un paar di e proyectonan aki ta ‘E Bos p’E Cambio’ y Aruba Youth Impact Café.
Aruba merece di un gobierno cu ta dinamico cu tin e capacidad pa enfrenta tur reto cu lo por bin den su caminda den futuro. Como un isla chikito nos ta rico den curashi y espirito di renobacion. Tur esaki ta tera fertil pa innovacion. Por medio di colaboracion y un maneho responsabel, Futura Lab bou di e direccion innovativo di Minister President, Evelyn-Wever Croes tey pa duna su aporte na e desaroyo sostenibel di nos economia y ekipa nos gobierno, nos hendenan y nos futuro generacionnan cu e habilidadnan pa enfrenta e retonan di futuro.
Pa mas informacion bishita e pagina Facebook Aruba Futura of website www.futuralab.org.
