Parlamento di Aruba a trata diahuebs ultimo e ley di TPEF cual ta Tourism Product Enhancement Funds cual mester percura pa mehoracion di e producto turismo di Aruba. Parlamentario Endy Croes a splica den su desertacion di ta contento cu e fondonan aki di TPEF ta wordo aloca entre otro pa Medio Ambiente, Seguridad, Infrastructura, Atraccion y Gerencia, esta Erfgoed. Parlamentario Croes a sigui splica cu el a repasa e documentonan y por a tuma nota cu bao di e post Gerencia a aloca placa e aña aki pa mantencion di Museo Arqueologico y alaves placa pa instalacion di airconan nobo pa dicho Museo. Locual a resalta ta e hecho cu Museo tin alrededor di dos aña cera y ta fuera di funcionamento. Tur esaki ta debi cu AVP y Mike De Meza a neglisha cu placa di TPEF, entre otro a usa mas cu tabata presupuesta na por ehempel Carubbian Festival di cual te cu awe no por produci un Jaarrekening cual alaves a causa cu no por a aporta na e Museo.
Defensa fofo di Mike
Parlamentario Endy Croes a keda sorpresa momento cu ex-minister Mike de Meza a puntra e Minister di Turismo actual Dangui Oduber durante reunion pa Jaarrekening di Carubbian Festival mientras cu su partido AVP y su mesun persona esta Mike de Meza mes tabata encarga cu Carubbian Festival desde 2016. Parlamentario Croes a mustra e seriedad di e Coalicion actual y a ilustra riba e post financiero 6403.5 di Gerencia refiriendo na TPEF con mesora a aloca placa pa drecha airconan di Museo Arqueologico y pone esaki operacional atrobe enbista cu masha hopi turista ta yega akinan pero e lugar ta cera debi na mal maneho di AVP y Mike de Meza. Mike de Meza mesora a pidi ‘persoonlijk feit’ y kier a contradeci Croes defendiendo su mes na un manera hopi “fofo” splicando cu e no tabata Minister di Cultura di cual segun Mike De Meza ta esun responsabel.
Solucion pa Museo Arqueologico
Parlamentario Croes ta reacciona mesora riba De Meza mustrando De Meza cu e minister actual esta Dangui Oduber tampoco ta minister di Cultura pero ta manehando e mesun fondo di TPEF cu Mike De Meza a maneha y ta for di e mesun fondonan aki e minister actual Dangui Oduber a aloca placa pa trece solucion berdadero pa e Museo cu ta di vital importancia pa nos turismo. Ta depende e boluntad y alaves kico ta importante pa bo, pasobra pa De Meza fiestamento sin control tabata tin prioridad. Croes ta mustra cu bo por sinti e cambio y aunke nos a hereda un Aruba cu un desaster financiero sin igual poco poco pero sigur ta drechando e “HOLOCAUSTO” cu Mike de Meza y AVP a laga atras. Cu pasenshi bo ta gana Gloria!!!
