ORANJESTAD, Aruba – E prome 7 lunanan di 2018 tabata sumamente positivo pa locual ta trata turismo di nos pais. Te cu luna di Juli 2018 Aruba a yama bon bini na un total di 641.763 turista “stay-over” cu ta nifica un crecemento 2%, pues 12.748 bishitante mas compara cu e prome 7 lunanan di e aña anterior. Excluyendo Venezuela, por mira un crecemeno di 6.6% cual ta 38.102 turista mas cu na 2017. Por mira un aumento di turista nan procedente di entre otro Merca, Canada, Brazil y Hulanda. Pa loke ta luna di juli, Aruba a ricibi un total di 101.386 bishitante ‘stay-over’, cu ta 0.9% menos compara cu e mesun luna na 2017.
Turismo “stay-over”
En comparacion cu 2017 pa locual ta trata turismo “stay-over” nos por wak cu e cantidad di bishitante nan procedente di Norte America den luna di juli a subi cu 4.4% cual ta un total di 3.086 turista mas cu na 2017. Norte America ta trece 71.6% di total di turismo pa Aruba. Pa juli 2018 por wak un aumento di 4.6% pa locual ta trata turismo for di Merca. Pa Canada tin un cremento di 0.7% compara cu juli di e aña anterior. Norte America a trece 486.244 turista total pa Aruba di januari te cu juli 2018, cual ta un aumento di 7.5% compara cu e mesun temporada na 2017. Esaki ta 33.859 turista mas cu e aña anterior.
Pa Sur America por wak cu Aruba a ricibi un total di 16.697 bishitante den luna di juli 2018.
Turismo crucero
Pa luna di juli 2018 Aruba a yama bon bini na 43.370 pasahero crucero riba un total di 16 barco crucero. Esaki ta nifica un aumento den turismo crucero di 45.4% compara cu juli 2017. Esaki ta 14.482 pasahero mas cu e aña anterior. Di januari pa juli 2018 nos a yama bon bini na un total di 483.615 pasahero crucero, pues un aumento di 3.6% compara cu 2017.
Hotel
Segun Aruba Hotel and Tourism Association pa luna di juli 2018, e ‘Average Daily Rate’ (ADR) a aumenta cu 15.5% compara cu juli 2017 di USD 216.09 na 2017 pa USD 249.52 na 2018. Di januari pa juli 2018 e ADR a subi cu 10.4% pues cu USD 282.24. E entrada pa camber disponibel (RevPAR) a aumenta cu 11.8% di USD 190.50 na juli 2017 pa USD 213.05 na juli 2018. Di januari te cu juli 2018 e RevPAR a subi cu 12.7% pues USD 247.51. E anochinan ocupa (ORN) pa camber ta baha cu 1.7% den juli 2018. Pa e prome 7 lunanan di 2018 ORN ta aumenta cu 1.9%.
Economia
Tur indicador ta demostra di ta positivo pa e prome 7 lunanan di 2018. Cifra nan ta demostra un aumento di 11.2% den entrada nan di turismo. Turismo ta keda e motor tras di nos economia. Turistanan di calidad ta yegando Aruba y esaki ta cuadra cu e vision di Minister di Turismo.