Ministerio di Salud Publico como tambe dirigentenan di Departamento di Salud Publico a keda completamente asombra diasabra atardi despues cu nan a tuma nota di informacionnan incorecto cu Center for Disease Control CDC recientemente a publica riba su website.
Riba esaki Departamento di Salud Publico Aruba tin pa reacciona cu actualmente na Aruba nos no ta experenciando ningun brote di Zika tampoco Dengue ni Chikungunya. E informacion publica pa CDC unda ta duna e impresion aki no ta cuadra cu berdad y un investigacion sigur lo bay wordo haci pa saca afo di unda e informacion eronio aki a sali y tambe mas puntonan incorecto riba e website.
Ta conoci cu den temporada di yobida Aruba sa confronta casonan di malesanan transmiti pa sangura manera Zika, Dengue y Chikungunya. Pa e motibo aki cu Departamento di Salud Publico tur aña di nobo ta lansa campaña di concientisacion riba prevencion di e malesanan aki pa stimula comunidad pa tuma accion pa preveni cu e sangura por reproduci su mes y plama e malesa.
Personal di Gele Koorts en Muskieten Bestrijding GKMB tambe ta cana cas pa cas y ta haci nan controlnan rutinario na e resortnan treciendo informacion riba prevencion di criadero antisipando e temporada di yobida.