121
Zuster Cherubinestraat, Oranjestad: Diaranson pa mas o menos 8’or y 25 di anochi, e transportwagen di polis tabata na caminda pa bay Warda di polis na Playa y na altura di Alfie’s Bar, nan ta wordo para pa un homber desconoci pa nan, kende ta bisa e polisnan cu algun minuut pasa un homber desconoci pa su persona a maltrata un dama. E homber a mustra polis, unda e homber cu a maltrata e dama tabata ta na e momento ey y tambe a bisa polis cu e dama ta riba vloer dilanti e porta di patras di Alfie’s.
E homber tabata den un auto preto y ora ela mira polis ela trata na bandona e sitio, pero mesora e polisnan a baha for di e transportwagen y un a bay na e auto, pa papia cu e homber. E otro agente policial a bay cerca e dama y por a scucha su yoramemto for di un distancia caba. Ora e polis a acerca e dama, ela mira hopi sanger riba su Jeans y tambe riba vloer. E tabata sangra pa boca y nanishi.
Un testigo a acerca polis y a declara, cu na momento cu e tabata canando, na altura di Alfie’s. ela mira un homber hisa un hende y e homber aki tabata dale, e persona cu e homber a hisa tabata un dama y manera e dama a haya un chens, ela core bay patras di Alfie’s pa pidi ayudo. Na e momento ey e testigo a mira cu ta un dama e homber tabata maltratando. E agressor a bay tras di e dama y a rank’e basta duro na su cabey.
E testigo a grita e homber, cu homber no por dal muher, mes momento e homber tabata bisa e muher pa bay cune. Ora e testigo a grita e homber, cu homber no por dal muher, e homber agressor a cana bay na e auto preto y e dama a keda benta riba vloer ta yora. E homber a start e auto pa bay net na momento cu polis a yega na altura di Alfie’s.
E dama ta di inicial A. naci na Venezuela dia 1 di augustus 1981, y tabata kedando na un cas na Pos Chikito. E no tabata desea di entrega keho, mirando cu e ta ilegal na Aruba. E dama a haya algun blousia na curpa y cara, rasca na su elleboog drechi, na su brasa links, na su cara y su wowo drechi tabata full hincha.
Na prome instante e dama no kier a papia cu polis, Polis a pidi pa presencia di ambulance, pero e dama a nenga mirando cu e ta ilegal riba Aruba . E dama a wordo hiba warda di polis na playa.
E agressor, ta e homber CF naci na Republica Dominicana dia 17 di Oktober 1982 y tambe tabata biba na Pos Chiquito, CF a keda deteni y a wordo transporta pa Warda di polis, unda e mester a presenta dilanti Hulpofficier van Justitie y a keda deteni.
E victima a wordo asisti pa personal di slachtofferhulp, despues di un rato na warda e victima a cuminsa sinti su cabes ta draai y hopi dolor na su band’i cara drechi, mesora a pidi pa presencia di ambulance na Warda di Playa. Na yegada personal di ambulance a dicidi di transporta e dama di inicial A. pa hospital pa un tratamento medico mas avansa. Despues cu e dama a bay hospital, polis a wordo notifica cu e dama a keda interna y cu su cashi wowo tabata kibra.