Den medionan di comunicacion a sali un relato basa riba un carta cu WEB lo a manda na Utilities Aruba NV, den cual carta WEB ta pidi pa hisa e tarifanan.
Utilities Aruba NV tin e carta den tratamento y a pidi WEB haci algun ehersicio pa baha gasto prome cu hisa prijs.
No ta un secreto cu e nivel di gastonan di companianan estatal ta hopi halto, y cu e solucion mas facil den nan bista semper ta pa hisa tarifa.
Asina por bisa cu prijs di crudo a subi mas cu 30% desde cu Gabinete Wever-Croes a sinta.
Ainda e dolor financiero di e ‘extreme hedging’ pa 3 aña y e inversion den un linea di gas pa ecogas a come hopi di e placa cu WEB tawatin.
Di otro banda e doño di e compania, Pais Aruba, kier evita cueste loke cueste pa hisa prijs di awa y coriente y lo haci esaki solamente despues cu tur tur otro alternativa wordo explora y resulta cu berdaderamente no tin otro solucion.
Segun WEB, debi na aumento di prijs di crudo internacionalmente mester hisa e prijs, y debi na e hecho cu pa soluciona e problema di Astec, mester bay na un azeta mas limpi y mas caro.
Riba esaki tambe Gobierno tabata hopi cla: no ta asina cu ta WEB so mester carga e gastonan y Gobierno a instrui Utilities y WEB pa hunto cu e stakeholders yega na reparticion di gastonan.
Pues WEB y Utilities ta haciendo nan esfuersonan ainda pa yega na claridad.
Basa riba tur esaki, un aumento di tarifa na e momento aki, no a wordo proponi na Gobierno.
Utilities Aruba N.V. ta lamenta cu informacion eroneo ta wordo publica pa prensa.
Hunta di Commissaro di Utilities Aruba nv