ORANJESTAD – Hopi ta e pregunta- y comentarionan tocante e situacion di e Crisis Plan Social y mas cu claro esaki ta puntra tambe si esaki ta den pleno ehecucion caba. Ta bon pa aclarea tambe segun Parlamentario Sue-Ann Ras – cu ta presidi e comision di supervision di Crisis Plan- cu ora ta trahando riba un programa di e grandura aki, e ta tuma tempo pa pone tur cos riba pia, a base di un bon analisis, structura y planificacion, p’e ehecucion por ta uno hopi responsabel, profesional y sostenibel. “Traha cu hende, semper ta un meta, cu bo no por mira resultado inmediato y ta tuma su tempo pa sinti y despues mira e resultado final”, e parlamentario ta bisa.
META GENERAL CRISIS PLAN SOCIAL
Pa loke ta trata e meta general, Crisis Plan Social tin 4 meta general segun Ras ta sigui splica:
- Prevencion y combati e desbentahanan social, manera: drop outs, criminalidad y problema di violencia, manera violencia domestico, abuso y negligencia.
- E meta final ta pa establece ‘child protective system’ den henter e cadena social, di cuido, educacion y husticia, p’asina e mucha por crece sano y salvo den e sociedad Arubano.
- Un maneho riba termino cortico (crisis), mediano y largo.
- E maneho aki ta cubri henter e cadena, cu tin di haber cu diferente sector: enseñansa, social, husticia, cuido di salud relaciona cu e grupo meta di mucha y hoben.
‘DRIESPORENBELEID’
E Parlamentario ta recorda cu no mester lubida niun momento so, cu e Crisis Plan Social su meta ta consisti di forma pa atende corectamente e.o. cu e mucha- y hobennan vulnerabel riba e tereno di siguridad social. “Pais Aruba a opta como maneho un ‘Driesporenbeleid’ como prioridad di intervencion den e Crisis Plan Social”, Ras a sigui bisa.
Di Prome Spoor: intervencion cu mester tuma luga inmediato. Prevencion primario y secundario y pregunta di ayudo trempan.
Di Dos Spoor: intervencion curativo y represivo y esaki ta costa hopi. E listanan di espera ta di un promedio di 2 aña, elimina ‘e casonan urgente’ y crea suficiente luga di refugio. Brinda sosten na e hobennan recidivante.
Di Tres Spoor: aki ta duna atencion na fortalecemento di posicion, retraso y siguridad di e grupo meta di mucha y hobennan cu limitacion.
LISTA DI ESPERA DI CASI 2 AÑA
Tambe no mester lubida cu e listanan di espera den henter e cadena social: Voogdijraad, Departamento di Asuntonan Social, Bureau Sostenemi, etc. ta core rond di 2 aña, compara cu Hulanda unda e lista di espera ta di 2 luna. Den tur e añanan anterior di descuido y negligencia pa e cadena social, unda cu e gobierno anterior a corta masha hopi mes den e presupuestonan, varios di e casonan cu tabata registra como menos alarmante/urgente, actualmente a bira ‘red flags’, unda cu nan por bira un crisis di un momento pa otro. Y desde e tragico incidente di e dos criaturanan, e yamadanan a cuminsa bira mas frecuente. “Pues e trabou ta inmenso, ya cu mester traha eficientemente, rapido y responsabel pa baha e lista di espera, atende e casonan ya registra y duna atencion inmediato na e casonan nobo”, Ras a sigui bisa. E Parlamentario ta sigui mustra cu tin hopi trabou pa ehecuta, ya cu tin varios buraco dentro di nos sistema, unda cu tampoco no ta duna ayudo, manera e mucha- y hobennan cu IQ abou y e ‘double troubles’ (e mucha-hobennan cu problema psikiatrico y adicto na droga). Tin tambe un retraso grandísimo den e cadena hudicial y sector di hende cu limitacion. “Pero nos ta trahando, y poco poco lo por yega na ehecuta e Crisis Plan pa asina e logra su meta y nos logra resolve e problema social mas cu ta posibel”, Ras a finaliza bisando.