Diaranson mainta, Prome Minister Evelyn Wever-Croes a hiba un conversacion cu Minister Stef Blok. Minister Blok kier a ofrece su disculpa pa e declaracionnan haci no intencional siman pasa na Hulanda. Prome Minister a expresa cu di banda di Aruba nos ta lamenta e expresionnan aki masha hopi mes.
“Nos Gobierno ta hibando un maneho di integracion y anti-discriminacion. Mas aun, nos Gobierno ta trahando duro pa tene e sentimentonan colonial y anti-hulandes bou di control, cu riba su mes caba ta hopi dificil pasobra hopi hende na Aruba ta di opinion cu Hulanda ta co-responsabel pa e problemanan financiero den nos pais pa e sosten incondicional cu nan a brinda Mike Eman y su Gobierno mientras nan tabata mandando nos pais bancarota. Consecuencia di esaki ta cu awor ta pueblo mester paga pa e mal gobernacion di gabinetenan Eman. E expresionnan di Minister Stef Blok siman pasa ta tira mas salo rib’e heridanan aki. Esey ta di lamenta”.
Otro tema cu Premier Wever-Croes a toca den e conbersacion cu Minister Blok ta riba e rapport cu e minister mes a traha na 2005 pa Tweede Kamer “bruggenbouwer”, den cual basicamente e conclusion ta cu mayoria di casonan di integracion na Hulanda tabata exitoso. E minister ta para tras di e conclusionnan ey ainda.
“Nos ta di opinion cu Aruba ta un comunidad multi-cultural, y nos forsa ta e respet cu nos ta brinda otro. Momento cu cuminsa falta respet, cu tipo di declaracionnan asina, cos ta sali for di man. Minister Stef Blok ta minister di asuntonan extetior di henter Reino y den su declaracionnan semper e mester tene cuenta cu e aspecto aki. Cu su palabranan mester refleha ponencia di henter Reino y den e caso aki su palabranan no a mustra respet pa nos comunidad multi cultural. P’esey mes palabranan di excusa no ta suficiente pa kita e daño haci. Ta accionnan so lo por demostra cu realmente ta trata di “palabranan no bon scogi” cu por trece trankilidad bek”, Prome Minister Evelyn Wever-Croes a expresa.