Recientemente Aruba Tourism Authority (A.T.A.) a publica resultadonan di Juni y cu esey resultadonan pa prome mita di 2018. Aki a refleha cu durante e prome mita di 2018, cantidad di bishitantenan a subi cu 2.6%, y cantidad di placa cu ta wordo registra pa AHATA como rendimento pa camber (RevPar) a subi cu 12.4%. A wordo constata cu 50% di e inventario hotelero caribense afecta pa horcannan den 2017, awor ta disponibel atrobe den mercado turistico di Caribe. No obstante di esaki proyeccionnan ta indicando cu restante di 2018 lo ta uno cu resultadonan positivo, danki na entre otro e inversionnan continuo y maneho proactivo di A.T.A.
Aruba ta proyecta di sigui crece no obstante retonan den Caribe
Midimento di calidad di bishitante ta un indicador y no ta e unico cu ta wordo aplica of midi. Ta premira continuacion di resultadonan turistico positivo pa 2018 cu un crecemento den cantidad di bishitante ‘stay-over’ pa Aruba. Tambe ta proyecta un temporada halto cu lo ta fuerte, despues di un bon temporada halto pa 2018. E aumento den cantidad lo bay man den man cu crecemento den entrada pa pais Aruba pa 2018. Esaki a crece cu 6.5% na 2018 (Tourism Receipts registra pa Banco Central Aruba). Mas cu claro factornan por cambia, incluyendo aspectonan den linea cu temporada di horcan 2018. Aparte di e incremento di cantidad di bishitante, A.T.A. a constata un crecemento positivo den calidad di bishitante ricibi y por a nota cu e calidad a subi mas fuerte cu e cantidad di turista, conforme e vision y maneho stipula. Pero esaki ta algo cu mester keda mantene y monitoria mirando cu otro paisnan den Caribe ta sigui introduci productonan nobo y na prijsnan atractivo. Esaki ta nifica cu e reto ta sigui y ta urgi pa keda inverti den Aruba su producto hotelero y turistico.
A.T.A. ta proyecta di cera 2018 cu un crecemento di 5.4% for di Norte America, unda Merca lo crece cu 5.5% y Canada cu 3.3%. Esaki man den man tambe cu proyeccionnan riba area di aviacion cual lo sigui incrementa for di e mercado Mericano durante restante di e aña. Conforme locual a registra y raporta durante e Conferencia Anual di Aruba pa e Mercado Norte Americano ATCA efectua na Mei, ta spera cu resultodanan fuerte di Merca – cual a subi cu 7.9% te cu Juni 2018 – lo sigui contribui grandemente na resultadonan turistico pa Aruba pa 2018. Te cu prome mita di e aña aki, Merca a representa 71% di bishitantenan total y pues e peso di e mercado ta uno sumamente importante y su comportacion ta refleha kico por spera e restante di e aña aki. Socionan a confirma cu mester enfoka tambe riba lansa extra incentivo pa sigura bishita di mas grupo MICE (Meetings, Incentives, Conferencing, Exhibitions) pa Aruba na 2020. ATA lo ta lansando esaki entrante augustus, y tambe lo mester enfoka riba sigui stimula esnan cu kier un vacantie pa book cu ainda mas adelanto pa Aruba. Te cu awor, A.T.A. ta proyecta di cera 2018 cu un crecemento for di Latino America excluyendo Venezuela y cu un desaroyo stabil for di Europa, unda cu lo compensa bahada di Inglatera cu crecemento di otro mercadonan. Esaki ta bay man den man tambe cu proyeccionnan riba area di aviacion pa restante di e aña aki y prome periodo di 2019.
50% di inventario di camber hotelero asota pa horcannan ta bek
A.T.A. continuamente ta organiza sesionnan strategico pa mantene e agilidad y rapides necesario pa keda altanto di desaroyonan di ultimo momento den industria turistico. Durante reunionnan recien organisa por medio di A.T.A. (North America Marketing Retreat) na Merca riba 25 y 26 di juni, como tambe e ‘LATAM 2019 Plan’ organisa na Aruba riba 13 di juli, a papia di 2018 y seguramente di 2019. Tur reunion a conta cu un presencia amplio di socionan turistico. Aki a elabora tambe riba e hecho cu 50% di e inventario hotelero di e islanan afecta pa e diferente horcannan na 2017 den Caribe ta bek, y cu otro destinacionnan caribense ta sigui traha pa esnan pendiente pronto ta ‘back on board’. Ta wordo premira cu 80% lo ta ‘back on board’ pa mediante di 2019. E reto pa Aruba lo ta pa sigui capitalisa di e oportunidadnan cu e ultimo punto aki ta brinda. Pero tambe pa sigui sigura negoshi mey mey di productonan hotelero nobo cu lo sigui añadi na e base di Caribe y na prijsnan competetivo permitiendo nan pa sigura e negoshi. Esaki ta rekeri entre otro empuhe adicional y kisas estimulo/incentivo adicional, haciendo e atractivo pa hotelnan sigui inverti den nan producto existente den e region competitivo di mar Caribe.
Inversion continuo ta esencial
Pa medio di estudionan continuo A.T.A. ta enfoca tambe riba Aruba su producto fisico y riba nos capital humano y actualmente ta finalisando estudionan di ‘Carrying Capacity’ y di ‘Niche Roadmap’. A.T.A. a inclui tambe un seccion den su rapport cu estadisica di Juni / promer mitar di anja, cu resultadonan di 2000 encuesta haci bou di nos comunidad na luna di maart 2018. E ‘Resident Sentiment Survey’ ta delinea kico nos hobennan y adultonan ta pensa di nos desaroyo turistico, y kico kier mira diferente riba area economico, cultural y di infrastructura. E estudionan aki, hunto cu e plan di desaroyo di producto turistico ‘Cu mira pa Futuro’ cual a lansa anja pasa, ta clave pa desaroyo di nos isla riba nivel turistico. Inversionnan y maneho mester tene cuenta cu e bishitante y na mes momento cu henter nos comunidad. Inversionnan cu alaves ta importante pa mantene e posicion competitivo di Aruba su turismo.