Den algun luna di trabou Minister Dangui Oduber a logra gran cantidad di asiento extra pa Aruba su turismo!

E industria turistico ta sigui demostra desaroyonan sumamente positivo pa nos destinacion. Turismo na e momentonan aki ta solido y duradero y den apenas algun luna di trabou Minister Dangui Oduber a logra trece un gran cantidad di asiento for di vuelonan directo for di Merca cu lo trece na su turno turistanan di calidad. Minister Oduber su enfoke ta pa target e turistanan di calidad cu ta laga hopi placa den nos economia.
Desde cambio di gobernacion a logra haya vuelonan for di Minneapolis cu Sun County Airlines, a logra vuelonan directo for di Dallas Texas y Chicago Illinois cu American Airlines y recientemente a logra vuelonan adicional for di Boston cu Jetblue. Tambe nos ta pendiente expansion di cantidad di asiento for di Copa Airlines for di Merca. Banda di esaki esfuerzonan ta wordo haci pa haya mas asiento for di Latino America y tambe di Europa. Minister Oduber ta masha contento cu e resultadonan concreto aki y ta demostra cu e ta cumpliendo cu su vision di trece turistanan di calidad. Aña 2018 ta un aña record pa Aruba y e reto ta pa mantene esaki na mesun nivel pa e añanan cu ta sigui. Tur indicador den turismo e aña aki ta positivo. REV PAR cu ta un indicador pa midi e calidad di turistanan ta den double digits y esaki ta confirma cu e calidad di turistanan ta biniendo Aruba a bira mas hopi.
E maneho cu Minister Dangui Oduber ta hibando ta dunando su fruto y ta creando e perspectiva positivo cu nos pais tin mester di dje. Na momento cu nos unico pilar economico ta demostra crecemento den tur sentido ta duna un aliento positivo na e desaroyo economico di nos pais.