Parlamentario Endy Croes: Di acuerdo cu Hulanda AVP a hiba nos 30 aña atras Na 2039 Aruba su Debe Nacional lo yega 50% cerca di unda MEP a lag’e na 2009

Parlamentario Endy Croes ta splica cu e ta indigna ora e lesa rapport y documentonan cu ta trece claridad cada dia mas y mas con Mike Eman y AVP a hundi nos pida baranca Aruba. Un maneho desastroso y sin gevoel pa pueblo. Recientemente e Parlamentario a pone su mes na altura di un nota di Hulanda cual ta specifica e direccion pa yega na un surplus mas liher cu ta posibel, ya cu solamente alcansando un Surplus e debe nacional esta e “staatsschuldquote” di Aruba lo por cuminsa baha. Tanten cu tin un deficit esaki lo keda aumenta. Den 8 aña di Mike Eman y AVP a mas cu redobla e debe di Aruba di 40% te cu 93%. Pues di cada florin awe cu drenta caha di gobierno 93 cen ta comprometi pa paga debenan haci door di Mike Eman. Alaves Aruba ta pagando 216 MIYON solamente na interes riba placanan presta door di gobierno di Mike Eman y AVP cual ta mescos cu 600 mil florin pa cada dia. E maneho aki a hiba Aruba den un debacle financiero conoci tambe como e Mega Debe. Siguiendo e nota recien por a mira cu calculacionnan haci pa profesornan y expertonan Hulandes den cuadro di alcansa un Surplus, na 2020 en adelante por cuminsa baha e debe nacional. Esaki por alcansa 70% na aña 2027, esta aki 9 aña y lo por alcansa 50% na 2039, pues aki 21 aña. Si compara cu na 2008 e debe tabata 41.7% (lesa Statistical Digest Banco Central) momento cu Mike Eman a tuma gobernacion di e pais aki mester conclui cu berdaderamente Mike Eman y AVP a hiba un maneho a la “Piratas del Caribe” causando daño enorme na nos finansas publico. Realmente pa yega bek unda nos tabata ta na 2009 nos ta papia di 30 aña. Pueblo puntra bo mes si ta esaki nos merece? Ta kico e pueblo aki a haci Mike Eman y AVP? Pakico mester a abusa di e confiansa cu pueblo a prestabo na 2009 y 2013? Wak bo propio yiu den su cara y bo mester splik’e cu Mike a crea un debe di 45 mil florin pa cada ciudadano y cada baby cu nace awe. Esaki ta palabra textualmente di Raymond Gradus, voorzitter di CAFT. Mike a grita cu e ta orguyoso di e debe y e debe t’ey pa nos tur bay pag’e den futuro y e ora di paga a yega. Pueblo a wordo manipula y engaña pa Mike y AVP cu palabranan bunita y promesanan falso. Gritonan den campaña di AVP na 2009: “NOS TA ELIMINA BBO”. Ora nan a haya poder nan a aumenta BBO introduciendo un BAZV di 2%. Pues AVP a bay cas lagando atras e BBO na 3.5% plus un desaster financiero. P’esey mi plegaria na cada un di boso cu Mike Eman bao di ningun pero ningun condicion no por ta digno mas di bo confiansa pa sirbi e pais aki. “Een vos verliest zijn haren maar niet zijn streken”. Ki ora bo topa Mike Eman ta baba hende na entiero puntr’e: “Mike, pakico nos mester ta orguyoso di e debe cu abo a crea? Mike, pakico bo a hiba nos 30 aña atras?” Finalisando ta pidi nos comunidad pasenshi pa hunto nos salvaguardia e pida baranca aki. Retonan ta grandi y sigur no ta uno facil pero cu Fe y confiansa nos lo recupera Aruba surpasando tur obstaculo pa construi un mihor Aruba pa futuro.