“Net algun dia prome, prome minister tambe a bin parlamento pa un reunion cu su fraccion a yama, caminda mester a duna informacion riba e maneho cu su gobierno ta bay hiba pa baha gasto di personal.
Sinembargo henter e reunion tabata un tipo di comedia y na luga di duna claridad, e reunion a termina cu tur cos, tur incertidumbre di kico su gobierno ta bay haci, igual cu prome cu e reunion.
No por ta otro tampoco ya cu e mesun prome minister aki, ta mesun persona cu a sigura pueblo cu e lo drecha finansa publico sin tuma medida, lo baha cantidad di minister di 9 pa shete y no a haci esaki, a felicita su mes y pueblo cu el a soluciona e situacion di frontera cu Venezuela pero awor e mes ta admiti cu cosnan no ta funcionando bon ainda.
El a informa su fraccion den parlamento cu un di e formanan cu su gobierno lo bay baha gasto ta di no tuma hende nobo den servicio, pero tur hende por mira cuanto hende a ser tuma den servicio caba y den cantidad di caso su gobierno a dicidi di manda un of otro director cas pa nombra e famoso ‘management team’ pa dirigi un of otro departamento cu lo costa dobel na salario.
Prome minister a sigura su fraccion cu su gobierno no ta bay duna ‘periodieke verhoging’ mas pero aki mi persona a bise caba algun dia atras, cu nos kier wak su gobierno keda sin duna un trahado su periodieke verhoging cu ta algo cu e tin derecho riba dje, y e trahado por hiba gobierno dilanti Corte y gana e caso aki tambe.
Su gobierno lo bay baha overtime cu ta un ehercicio cu den gobierno di AVP a wordo discuti y analisa pero tur hende sa cu hopi di e overtime nan aki no ta cosnan mara na hendenan cu no ta haci nada pero mara na e situacion cu nos ta aden, caminda hopi bes un departamento falta hende, of ta presenta un situacion cu mester atende cu esaki, pues cu esaki tampoco nos ta mira cu su gobierno lo atende cu esaki.
VUT regeling ta otro punto cu prome minister a informa parlamento di dje pero aki ya caba gobierno di AVP a presenta e formula aki pero e interes cu tin di parti di trahadonan den servicio di gobierno, practicamente no ta existi.
El a papia di ‘disciplinaire ontslag’ caminda ta intencion di manda hende cas pa motibonan disciplinario manera cu su gobierno a haci caba c’un gang caba y tambe e kier elimina e ‘overtolligheidspoule’ y esaki ta hopi pret di parti di e prome minister.
E ta bin parlamento pa bisa cu e kier elimina e overtolligheidspoule pero na mes momento nos ta mira con su gobierno, sigui suspende y prohibi entrada pa departamentonan, pues e prome minister mes ta yenando e overtolligheidspoule aki.
Ta hopi gracioso scucha prome minister papia di elimina e grupo aki, pero su gobierno a manda director di DTP, sr Keteldijk a wordo manda cas, director di departamento salubridad publico, sr Staring a wordo manda cas, director Faroup di Bureau Statistiek a wordo manda cas, sr Fingal di IASA a wordo manda cas, sr Oduber di Meteo a wordo manda cas, sr Tromp di Casinowezen a wordo manda cas, sr Blijden di Warda nos Costa a wordo manda cas, directornan di MFA a wordo manda cas, pues kico ta maneho di e gobierno aki?
Prome minister kier elimina un poule cu e mes ta yenando aworaki, un maneho descabeya y ta papia di un maneho pa baha gasto cu 12 miyon pero entre otro Raad van Advies a mustra cu su gobierno den un par di luna, a nombra 100 hende den servicio,” Parlamentario Marlon Sneek a declara.