Semper den mi bida mi a kere den sindicalismo. Sigur debi cu sindicalismo a hunga un rol grandi y importante den e lucha pa e logro di nos Status Aparte y cu ta danki na e lucha aki awe nos país ta unda cu e ta y cu a yuda hopi hoben manera mi mesun persona por a progresa y unda mi ta awendia. Lamentablemente e ultimo añanan diferente sindicato a percura pa e clase trahador perde confianza den nan funcionamento y ayera tabata muestra di cu cierto sindicatonan lamentablemente tin un agenda politico scondi dependiente ken ta na mando.
Berdad y no shisheria
Pakico mi ta bisa esaki? Debi cu ayera Serlimar a manifesta, cu ta nan derecho pasobra nos ta biba den un estado di derecho. Pero un manifestacion mester ta basa riba berdad y no riba shisheria (redo). Nos di fraccion di MEP y sigur mi persona a bay topa cu e trahadornan y sindicato SEPPA y tambe e shopstewardnan cu ta respresenta e trahadornan pa sa exactamente kico ta nan intrankilidad. Ora a yega a bin constata cu e motibo cu a bin ta cu nos lo ta cambiando e ley di Serlimar di 2005 y tambe tabata papia di un mocion cu lo ser pasa y cu lo ta afecta e trahadornan di Serlimar.
Cambio di ley di Serlimar
Esaki ta totalmente un mentira y sindicato SEPPA por a haya claridad riba e puntonan di agenda di e reunion publico door di no yama mi persona ni presidente di Staten, pero door di simplemente yama e Griffier di Staten cu lo a confirma cu e reunion tabata encera cu fraccion di MEP a yama un reunion publico riba e implementacion di fecha di cobra pa recoge sushi y tambe e fondo extra di 5.4 miyon florin cu a ser aloca den presupuesto 2018 pa por cubri pa servicionan di Serlimar y p’asina pueblo no tin di paga pa 2018, mientras ta busca e miho manera pa cobra. Pa cu e formula usa aki tambe fraccion di MEP lo tabata busca informacion. Y manera mi a indica sr. Marlin cu e mester por sa mihor e procedura pa cambia un ley y con e trayectoria di esaki ta. Nos di parlamento pa haci cambio of entrega un iniciativa di ley, e mester pasa den man di Griffier pa e por bay Raad van Advies y sr. Marlín por a verifica facilmente cu esaki no ta e caso. Pues e rumor (shisheria) di cambia ley ningun momento tabata e esencia di e reunion publico sino e 5.4 miyon florin extra aloca pa no cobra pueblo pa recogemento di sushi pa 2018.
Mocion cu lo ser entrega
Un mocion ta ser entrega durante un reunion y mester sosten di por lo menos 2 firma mas pa por entrega esaki y pa esaki ser atendí. Pero den bista cu nos ta den un coalicion esaki ta ser discuti en general prome pa wak si ta conta cu sosten y tambe ta atende cu oposicion kico ta nan pensamento riba cierto mocionnan y si nan lo sostene. Den e caso aki ta hopi straño con sindicato SEPPA y nan shopstewardnan tabata insisti di un mocion cu lo ser entrega y cu lo perhudica e trahadornan, debi cu esaki no tabata conoci pa oposicion. Pa tur hende ta na altura, e contenido di e mocion tabata simplemente: hala e fecha di cobranza pa 1 di januari 2019, revisa e tarifanan, y usa e fondonan aloca pa por hala e fecha ya menciona. Pues no tabatin nada cu lo a perhudica e trahadornan di Serlimar. Pues dos cos tin: 1. e formulacion na Hulandes tabata un obstaculo pa comprende of 2. deliberadamente a duna contenido robes pa crea un conmocion y pa pone integrantenan di fraccion di MEP den mal bista cerca trahadornan di Serlimar.
E carta misterioso
Durante e combersacion dilanti Parlamento a papia di un carta cu a ser manda pa parlamento. Ora mi persona a puntra si por haya un copia di e carta pasobra nos di parlamento no a haya esaki, a bin resulta cu esaki tabata un mentira pasobra sindicato mes a bira indica cu tabata un intencion di manda un carta.
Mi ta lamenta e forma di actua di sindicato SEPPA den e situacion aki cu ta pone un mancha scur riba sindicalismo na Aruba y mi ta condena con a usa e homber y muhernan humilde door di gaña y instiga contra parlamento pa nan bin manifesta mientras cu tur informacion berdadero tabata facil pa yega na dje. Mi ta spera cu di awo en adelante nos trata di haci tur cos cu dialogo y en busca di e berdad y no bay a base di manipulacion y mentira.
