E burdugo Gabriel Martien tin e caracteristicanan visibel di un psicopata y ta wordo considera como un persona hopi peligroso.
E burdugo a haya 10 aña castigo di prison y despues obligatoriamente mester wordo interna den un instituto, pues prome cu 15 aña e lo por recupera su libertad, e SI tin ainda un bida su dilanti. Pero e dos angelitonan, nan a wordo cruelmente ranca for di e mundo aki, door di e burdugo aki. E forma cu nan a wordo asesina y a sconde e curpa di un nan pa simannan largo, bal 15 aña so di castigo?
Oranjestad: Diabierna den oranan trempan di mainta, corte a dicta sentencia den e conocido caso Speeltuin. Gabriel Martien lo mester sinta 10 aña prome cu e wordo interna den un clinica como TBS. TBS na hulandes ta Terbeschikkingstelling, Esaki ta un medida cu un hues por impone, den casonan caminda un acusado a comete un crimen hopi serio pa motibo di tin problemanan psichiatrico, e acusadonan cu haya e medida di TBS ta wordo considera como personanan hopi peligroso.
Den e caso aki por conclui cu si Gabriel no haya e tratamentonan necesario, despues cu e recupera su libertad, elo por bolbe comete crimennan di tal indole.
E acusacion
E acusacion contra Gabriel Martien tabata asesinato y maltrato (pisa) di dos mucha homber (rumannan) menor di edad; maltrato di e otro acusado den e caso aki (Risheilla kende ta mama di e dos muchanan); y e hecho cu el a sconde un curpa.
Hues na momento di lesa su veredicto a splica cu OM a pidi un castigo di 15 aña di prizon y e medida di TBS, cu cuido y bou guia. Tambe a pidi pa impone un castigo condicional cu el a haya den pasado.
E acusado a confesa su delitonan
E sospechoso a coopera den e investigacion penal y a duna un declaracion den cual pa gran parti e ta confesa su delitonan. Tambe el a mustra Polisnan unda e curpa di Eugene ta dera. Su declaracionnan ta wordo confirma via di declaracionnan di e co-sospechoso testigonan y rapport di autopsianan, den cual e indole y cantidad di e lesionnan causa door di e sospechoso a keda señala.
Un castigo balansa
Hues ta bisa cu Corte tambe a yega na e mesun conclusion.
Den e caso aki e ta bay pa busca un castigo unda ta pone den balansa e derecho pa haya husticia pa e sufrimento cu a causa e victimanan y nan familiarnan y di otro banda evita pa ripiticion, cu cual e siguridad di comunidad ta wordo sirbi.
E sospechoso a wordo evalua door di psychiater y psycholoog. Ambos experto a yega na e conclusion cu cerca e sospechoso por papia di un problema di personalidad antisocial, cu caracteristicanan visibel di un psicopata. E ta considera menos responsabel pa su actonan.
TBS
Nan ta bisa tambe cu si e sospechoso no wordo trata, e chens pa e ripiti e hechonan aki ta grandi. Den pasado a resulta cu e sospechoso no ta compromete su mes facil pa wordo trata. Pa por tin exito den esaki, e lo mester haya un tratamento di largo duracion. E unico forma pa realisa esaki, segun e expertonan, ta den forma obligatorio. Pa e motibonan aki nan ta conseha pa duna Gabriel TBS cu cuido obligatorio, esta pone na disposicion di Gobierno (den combinacion cu un castigo di prizon).
Esaki, Hues a bisa, ta conduci na opinion di Corte cu no ta suficiente pa solamente impone un castigo di prizon incondicional, pero tambe mester tuma un medida pa pone na disposicion di Gobierno (obligatorio), pa evita cu den futuro e ta comete atrobe delitonan di violencia.
Pa motibo cu e medida ta wordo impone riba delitonan cu ta dirigi of ta un peligro pa curpa di un of mas persona, e duracion total di medida di TBS no tin un tempo maximo cu e mester keda bou di esaki.
Castigo incondicional di 15 aña lo ta na su lugar
Corte ta yega na e conclusion cu, banda di e medida di TBS cu cuido den un instituto di Gobierno, un castigo incondicional di 15 aña, manera cu a wordo exigi door di Ministerio Publico, ta na su luga. Den esaki Corte a tene cuenta cu e seriedad di e hechonan declara proba, e problema di personalidad y e hecho cu e acusado ta menos responsabel y e interes pa e acusado cuminsa cu su tratamento despues di no mucho tempo.
Corte tambe a haya cu no ta oportuno pa ordena ehecucion di un castigo condicional bieu, debi na e castigo cu e ta bay haya awo y e medida impone riba dje.
Acusado mester sinta 10 aña prome cu por wordo ubica den un clinica pa TBS
Na e momentonan aki Aruba no ta dispone di un clinica TBS. E ubicacion den un clinica TBS ta bini na ordo ora cu e acusado a sinta por lo menos 2/3 parti di su castigo, pues no prome cu aki 10 aña.
Mientrastanto ta wordo investiga e posibilidad pa habri un clinica TBS na Corsou, pa esnan condena na Aruba, Boneiro, Sint Maarten, Saba y St. Eustatius. Si e clinica no wordo realisa, Aruba y Ministerio Publico mester investiga si e sospechoso na e momento adecuado por wordo ubica den un clinica TBS na Hulanda.
Codigo Penal di Aruba ta ofrece e posibilidad aki. Pa Corte ta inaceptabel pa laga e sospechoso bolbe den comunidad bek sin un tratamento obligatorio.
